ڈاکٹر شاہنواز کو جعلی مقابلے میں قتل کرنے والے پولیس اہلکاروں کے خلاف مقدمہ درج کرلیا گیا ہے۔
سندھ کے علاقے میرپور خاص میں ڈاکٹر شاہنواز کی پولیس مقابلے میں ہلاکت پر ڈی آئی جاوید جسکانی ، ایس ایس پی چوہدری اسد اور ایس ایس پی آصف رضا سمیت دیگر کے خلاف مقدمہ درج کرلیا گیا ہے۔
یہ بھی پڑھیں: ڈاکٹر شاہنواز کو جعلی پولیس مقابلے میں قتل کیا گیا، وزیرداخلہ سندھ
مذکورہ پولیس اہلکاروں کے خلاف مقدمے میں قتل، انسداد دہشت گردی اور ہنگامہ آرائی سمیت دیگر دفعات عائد کی گئی ہیں۔
یاد رہے کہ رواں ماہ 20 ستمبر کو سندھ کے علاقے عمر کوٹ میں پولیس نے توہین مذہب کے الزام کا سامنا کرنے والے ایک ڈاکٹر کو مبینہ پولیس مقابلے میں مارنے کا دعویٰ کیا تھا، یہ ایک ہفتے کے دوران اس نوعیت کے ماورائے عدالت کا دوسرا واقعہ تھا، جس کی انسانی حقوق کے گروپوں نے شدید مذمت کی تھی۔
پولیس نے مقتول کی شناخت ڈاکٹر شاہنواز کے نام سے کی، جو مارے جانے سے 2 روز قبل مبینہ طور پر توہین مذہب کے الزام کے بعد روپوش ہو گئے تھے۔
یہ بھی پڑھیں: تربت: توہین مذہب کے الزام میں نجی اسکول کا استاد قتل
گزشتہ روز وزیرداخلہ سندھ ضیالنجار نے پریس کانفرنس میں بتایا تھا کہ عمرکوٹ میں ڈاکٹر شاہنواز کو جعلی پولیس مقابلے میں قتل کیا گیا ہے۔
صوبائی وزیرداخلہ کے مطابق اس بات کی تحقیقات ابھی جاری ہیں کہ ڈاکٹر شاہنواز معصوم تھے یا قصوروار تھے، واقعے میں ملوث دو پولیس افسران معطل کردیے گئے ہیں۔
