خصوصی سرمایہ کاری سہولت کونسل کے تعاون سے پاکستان کی آئل اینڈ گیس ڈویلپمنٹ کمپنی لمیٹڈ (او جی ڈی سی ایل) اور چائنا سینٹرل ڈیپازٹری اینڈ کلیئرنگ کمپنی نے پاکستان کی شیل اور ٹائٹ گیس کی صلاحیت کو فروغ دینے کے لیے ایک مفاہمتی یادداشت پر دستخط کیے ہیں۔
چین کے ساتھ اس نئی شراکت داری کا مقصد ملک کی توانائی کی بڑھتی ہوئی ضروریات کو پورا کرنے کے لیے پاکستان کے مقامی توانائی کے وسائل کو بروئے کار لانا ہے، اس یادداشت کے تحت سی سی ڈی سی اپنی ڈرلنگ اور اپ اسٹریم آئل فیلڈ سروسز کے ذریعے ایکسپلوریشن اور پروڈکشن میں او جی ڈی سی ایل کو معاونت فراہم کرے گی۔
یہ بھی پڑھیں:ایس آئی ایف سی کی ایک سال میں سرمایہ کاری سے متعلق کارکردگی کیسی رہی؟
خصوصی سرمایہ کاری سہولت کونسل یعنی ایس آئی ایف سی ملک میں پیٹرولیم کے نئے ذخائر دریافت کرنے کے لیے حکومت کو مکمل معاونت فراہم کر رہی ہے جبکہ او جی ڈی سی ایل ملک میں توانائی کی ضروریات کو پورا کرنے کی خاطر شیل گیس کے ذخائر سے فائدہ اٹھانے کے لیے پہلے ہی 30 ملین ڈالر کی سرمایہ کاری کر چکی ہے۔
سرکاری اعلامیہ کے مطابق مذکورہ یادداشت پاکستان کے غیر استعمال شدہ توانائی کے وسائل کو تلاش کرنے اور ملک کو توانائی میں خود کفیل بنانےکے لیے ایک اہم قدم کی نشاندہی کرتی ہے، یہ یادداشت مستقبل میں پاکستان کے لیے درآمدات پر انحصار کم کرنےکے لیے موثر ثابت ہو گی جس سے ملک کے قدرتی وسائل پر انحصار بڑھے گا۔
مزید پڑھیں:چین کے اعلیٰ سطح کے وفد کا ایس آئی ایف سی کا دورہ، سرمایہ کاری میں دلچسپی کا اظہار
’ملک کو درپیش معاشی چیلنجز سے نمٹنے کے لیے چین کی کمپنیوں کا تعاون نہ صرف ماحول دوست ہے بلکہ مضبوط اور مستحکم معیشت کی ضمانت ہے، بلا شبہ ملکی معیشت کے استحکام کا دارو مدار توانائی کے شعبے پر ہے، جس کے فروغ کے لیے ایس آئی ایف سی کی خدمات قابل قدر ہیں۔‘
