سینیئر وزیر پنجاب حکومت مریم اورنگزیب نے پاکستان انٹرنیشنل ایئرلائنز (پی آئی اے) کی خریداری سے متعلق نواز شریف کے دعوے کے تردید کردی۔
لاہور میں نجی ٹی وی سے گفتگو کرتے ہوئے انہوں نے کہاکہ اس خبر میں کوئی حقیقت نہیں کہ پنجاب حکومت پی آئی اے کو خرید رہی ہے۔
یہ بھی پڑھیں پنجاب حکومت کا پی آئی اے خریداری پر غور، ملک کو اچھی ایئر لائن میسر آئے گی: نواز شریف
واضح رہے کہ گزشتہ روز صدر پاکستان مسلم لیگ ن نواز شریف نے امریکا میں پاکستانی کمیونٹی سے خطاب کرتے ہوئے کہا تھا کہ مریم نواز چاہتی ہیں کہ پی آئی اے کو خرید کر ایئرپنجاب کے نام سے سروس شروع کی جائے۔
نواز شریف نے مزید کہاکہ میں نے مریم نواز کو مشورہ دیا ہے کہ آپ پی آئی اے کو خرید لیں یا نئی ایئرلائن بھی شروع کی جاسکتی ہے۔ اب اس حوالے سے غور و خوض جاری ہے۔
دوسری جانب امریکا سے لندن واپس پہنچنے پر آج ایک بار پھر نواز شریف نے کہاکہ مریم نواز سے پی آئی اے کی خریداری پر جو بات ہوئی اس پر مزید کام کا ارادہ ہے، تاہم سینیئر وزیر پنجاب مریم اورنگزیب ایسے دعوؤں کی تردید کررہی ہیں۔
میڈیا رپورٹس کے مطابق حکومت پنجاب نے فیصلہ کیا ہے کہ پی آئی اے کو خریدنے کے بجائے پنجاب ایئرلائن کے نام سے نئی ایئرلائن شروع کی جائے گی۔
یہ بھی پڑھیں پی آئی اے کو چلانا نہیں بیچنا میری ذمہ داری، لیکن اونے پونے فروخت نہیں کرسکتے، وزیر نجکاری عبدالعلیم خان
میڈیا رپورٹس میں کہا گیا ہے کہ پنجاب ایئرلائن کی فزیبیلٹی پر کام شروع کردیا گیا ہے، یہ ایئرلائن پرائیویٹ سرمایہ کاروں کے ساتھ مل کر لائی جائے گی۔
