ملتان پاکستان کے آلودہ ترین شہروں میں پہلے نمبر پر آگیا ہے۔ ایئر کوالٹی انڈیکس 1900 سے تجاوز کر گیا۔ انڈیکس میں پاکستان کے آلودہ ترین شہروں میں لاہور کا دوسرا نمبر ہے جبکہ پنجاب اور کے پی کے کئی شہروں میں بھی دھند اور اسموگ نے ڈیرے ڈالے ہوئے ہیں۔
دھند اور اسموگ کی وجہ سے موٹروے ایم 1 چارسدہ سے اکبر پورہ تک، موٹروے ایم 2 لاہور سے کوٹ سرور تک، موٹروے ایم 3 سمندری سے درخانہ اور ایم 4 پنڈی بھٹیاں سے عبدالحکیم تک ہر قسم کی ٹریفک کے لیے بند کردی گئی ہیں۔
مزید پڑھیں:اسموگ کے خاتمے کے لیے پنجاب حکومت کیا اقدامات کررہی ہے؟
موٹروے ایم فائیو شیرشاہ سے جھانگڑہ تک اور لاہور سیالکوٹ موٹروے بھی ٹریفک کے لیے بند کر دی گئی ہے۔ پنجاب کے مختلف شہروں میں اسموگ کے مسئلے سے نمنٹنے کے لیے لاہور ہائیکورٹ نے پنجاب بھر میں بازار رات 8 بجے بند کرنے کا حکم دیا ہے جبکہ پنجاب بھر میں اتوار کو بھی تمام بازار بند رہیں گے۔
اسموگ سے متاثرہ 4 ڈویژن کے 18 اضلاع میں کھیلوں کے میدان، عجائب گھر اور چڑیا گھر سمیت تمام تفریحی مقامات بھی 17 نومبر تک بند رہیں گے۔ لاہور والڈ سٹی اتھارٹی نے بھی شہر میں تمام سیاحتی اور تفریحی پروگرام اور تقریبات 17 نومبر تک معطل کردی ہیں۔
