راولپنڈی کی انسداد دہشتگردی عدالت نے پاکستان تحریک انصاف کے بانی عمران خان کا 28 ستمبر کو درج کیے گئے مقدمے میں 5 روزہ جسمانی ریمانڈ منظور کرلیا۔
انسداد دہشتگردی عدالت کے جج نے اڈیالہ جیل میں کیس کی سماعت کی، درج کیے گئے مقدمے میں عمران خان پر الزام ہے کہ انہوں نے 28 ستمبر کو عوام کو احتجاج پر اکسایا، جنہوں نے سرکاری املاک پر حملے کیے۔
یہ بھی پڑھیں عمران خان کی جناح ہاؤس حملہ سمیت لاہور میں درج 9 مئی کے مقدمات میں گرفتاری ڈال دی گئی
عوام کو احتجاج پر اکسانے کے کیس میں عمران خان کی طرف سے بیرسٹر سلمان صفدر پیش ہوئے جبکہ حکومت کی طرف سے پراسیکیوٹر نے دلائل دیے۔
دوران سماعت اسپیشل پبلک پراسیکیوٹر ظہیر شاہ نے عدالت سے درخواست کی کہ عمران خان کا 15 روزہ جسمانی ریمانڈ منظور کیا جائے۔
اس موقع پر پی ٹی آئی کے وکیل بیرسٹر سلمان صفدر نے جسمانی ریمانڈ کی مخالفت کرتے ہوئے کہاکہ بانی پی ٹی آئی ڈیڑھ سال سے جیل میں قید ہیں، کیسے ممکن ہے کہ انہوں نے جیل میں بیٹھ کر اتنی بڑی منصوبہ بندی کرلی۔
سلمان صفدر نے کہاکہ عمران خان کے خلاف درج مقدمہ سیاسی انتقامی کارروائی ہے، اور متن میں جو کچھ درج ہے یہ مفروضوں پر مبنی ہے۔
بعدازاں عدالت نے پراسیکیوٹر کی جانب سے 15 روزہ جسمانی ریمانڈ کی استدعا مسترد کرتے ہوئے عمران خان کا 5 روزہ جسمانی ریمانڈ منظور کرلیا۔
انسداد دہشتگردی کی عدالت نے حکم دیا کہ عمران خان سے جیل کے اندر ہی تفتیش کی جائے، انہوں نے بانی پی ٹی آئی کو 26 نومبر کو دوبارہ پیش کرنے کے احکامات دیے۔
یہ بھی پڑھیں مذاکرات میں پیش رفت ہوئی تو 24 نومبر کا احتجاج جشن میں بدل جائیگا، عمران خان
یاد رہے کہ پاکستان تحریک انصاف کے بانی عمران خان پر الزام ہے کہ انہوں نے 28 ستمبر کو راولپنڈی میں عوام کو احتجاج کے لیے اکسایا، بانی پی ٹی آئی کے خلاف راولپنڈی کے تھانہ نیوٹاؤن میں مقدمہ درج ہے، اور پولیس نے گزشتہ رات اڈیالہ جیل میں ان کی گرفتاری ڈالی تھی۔
