آزاد کشمیر سپریم کورٹ نے حکومت کی جانب سے جاری کردہ متنازعہ صدارتی آرڈیننس معطل کردیا ہے۔
چیف جسٹس آزاد کشمیر سپریم کورٹ جسٹس راجہ سعید اکرم کی سربراہی میں فل کورٹ نے ابتدائی سماعت کے بعد معطلی کا حکم جاری کیا۔ جسٹس خواجہ محمد نسیم اور جسٹس رضا علی خان بھی فل کورٹ بینچ کا حصہ تھے۔
یہ بھی پڑھیں: آزاد کشمیر میں صدارتی آرڈیننس کیخلاف احتجاج کا سلسلہ جاری
عدالت نے بار کونسل اور سول سوسائٹی کی اپیل پر حکومت کو آرڈیننس پر عملدرآمد سے روک دیا ہے۔
یاد رہے کہ صدارتی آرڈیننس کے تحت کسی بھی احتجاج اور جلسہ جلوس سے قبل ڈپٹی کمشنر سے ایک ہفتہ قبل اجازت لینا ضروری تھا۔ آرڈیننس کے تحت کسی بھی غیر رجسٹر جماعت یا تنظیم کو احتجاج کے لیے درخواست کا حق حاصل نہیں دیا گیا تھا۔
متنازعہ صدارتی آرڈیننس کے خلاف عوامی ایکشن کمیٹی نے 5 دسمبر کو ریاست گیر پہیہ جام اور شٹر ڈاؤن ہڑتال کی کال دے رکھی ہے۔ آزاد کشمیر کی تمام بار ایسوسی ایشنز اور سیاسی جماعتوں نے بھی اس آرڈیننس کو مسترد کر دیا تھا۔
یہ بھی پڑھیں: آزاد کشمیر: عوام کو احتجاج سے روکنے کے آرڈیننس کے خلاف مزاحمت جاری، کوٹلی میں پولیس پر پتھراؤ
واضح رہے کہ متنازعہ صدارتی آرڈیننس کے خلاف آزاد کشمیر کے مختلف شہروں میں گزشتہ چند ہفتوں سے شدید احتجاج کیا جارہا ہے، جس میں مظاہرین کی جانب سے اعلان کیا گیا کہ وہ اس قانون کے خاتمے تک جدوجہد جاری رکھیں گے۔
صدارتی آرڈیننس کے خلاف احتجاج میں مظاہرین اور پولیس کے درمیان جھڑپیں بھی ہوئیں جس میں متعدد افراد زخمی ہوئے۔ پولیس کی جانب سے کی جانے والی آنسو گیس کی شیلنگ کے بعد تاجر برادری نے شٹر ڈاؤن ہڑتال کا اعلان بھی کیا تھا۔
