تحریک انصاف کے وائس چیئرمین شاہ محمود قریشی نے کہا ہے کہ مذاکرات پی ٹی آئی نہیں بلکہ پاکستان کی ضرورت ہیں۔
انسداد دہشتگردی عدالت لاہور میں پیشی کے موقع پر صحافیوں سے گفتگو کرتے ہوئے سابق وزیر خارجہ کا کہنا تھا کہ مذاکرات کی ناکامی ملک میں جمہوریت کے دور کے لیے خطرہ ہوگی اور میری دعا ہے کہ مذاکرات کسی منطقی نتیجے تک پہنچیں۔
شاہ محمود قریشی نے کہا کہ مذاکرات مثبت نتیجے پر پہنچنے چاہئیں ورنہ حکومت ڈگمگا جائے گی۔ مذاکرات ہونے دیں، حکومت وقت پورا کرتی ہے یا نہیں وہ بعد کی بات ہے۔
یہ بھی پڑھیے:پارٹی قیادت کو ٹکراؤ کے بجائے سیاسی مذاکرات کرنے کی تجویز دی ہے، شاہ محمود قریشی
ان کا کہنا تھا کہ بانی پی ٹی آئی کی سوچ ملک کے مفاد کے لیے ہے اور ان کی جماعت نے نیک نیتی سے مذاکرات کا عمل شروع کیا ہے۔ انہوں نے مطالبہ کیا کہ جمہوریت کے دعویدار سنجیدگی سے مذاکرات آگے بڑھائیں۔
شاہ محمود قریشی نے یہ بھی کہا کہ ہمارا کوئی ناجائز مطالبہ نہیں ہے، جو سیاسی قیدی ہیں ان کو رہا کیا جائے۔ انہوں نے شکوہ کیا کہ ضمانت تو قتل کے ملزم کو بھی مل جاتی ہے، ہم ڈیڑھ سال سے جیل میں ہیں، ہمیں ضمانت ملی نہ کیس شروع ہوا۔
