جمعیت علما اسلام (جے یو آئی) کے سربراہ مولانا فضل الرحمان سے پی ٹی آئی کے وفد نے ملاقات کی ہے، اور رابطوں کے لیے دو رکنی کمیٹی تشکیل دے دی ہے۔
سربراہ جے یو آئی مولانا فضل الرحمان سے اپوزیشن لیڈر قومی اسمبلی عمر ایوب، اسد قیصر، سلمان اکرم راجا، صاحبزادہ حامد رضا اور دیگر نے ملاقات کی۔
یہ بھی پڑھیں عمران خان سے میری ملاقات کے معاملے پر پی ٹی آئی اور جے یو آئی میں مخالفت موجود ہے، مولانا فضل الرحمان
پاکستان اس وقت شمالی کوریا اور میانمار ماڈل کی طرف جارہا ہے، عمر ایوب
ملاقات کے بعد میڈیا سے گفتگو کرتے ہوئے اپوزیشن لیڈر عمر ایوب نے کہاکہ ہم نے جمہوریت کے فروغ کے لیے مولانا فضل الرحمان سے ملاقات کی ہے، پاکستان اس وقت شمالی کوریا اور میانمار ماڈل کی طرف جارہا ہے۔
انہوں نے کہاکہ ہم نے چیف الیکشن کمشنر اور دو ارکان کے تقرر کے معاملے پر مولانا فضل الرحمان سے بات چیت کی، اس کے علاوہ حکومت سے مذاکرات کے حوالے سے بھی ان کو اعتماد میں لیا۔
عمر ایوب نے کہاکہ 9 مئی اور 26 نومبر پر جوڈیشل کمیشن نہ بننے پر حکومت سے مذاکرات معطل کیے، اور ہم نے اس حوالے سے پہلے ہی حکومت کو آگاہ کردیا تھا کہ کمیشن نہ بنا تو بات آگے نہیں بڑھے گی۔
اپوزیشن لیڈر نے کہاکہ حکومت نے ہمارے ساتھ وعدہ کیا تھا کہ عمران خان سے علیحدگی میں ملاقات کرائی جائےگی، لیکن وہ وعدہ بھی وفا نہ ہوسکا۔
فضل الرحمان کے ساتھ آگے بڑھنے کے بہت امکانات ہیں، سلمان اکرم راجا
میڈیا سے گفتگو کرتے ہوئے پی ٹی آئی کے سیکریٹری جنرل سلمان اکرم راجا نے کہاکہ مولانا فضل الرحمان نے توجہ سے ہماری بات سنی، آگے بڑھنے کے بہت امکانات ہیں۔
انہوں نے کہاکہ آئین کو بچانے کے لیے ہم سب مشاورت کررہے ہیں، کیونکہ اس وقت ملک میں آئینی حقوق معطل ہیں، اور اکٹھے کھڑے ہونے پر بھی مقدمہ بنا دیا جاتا ہے۔
پی ٹی آئی اور جے یو آئی کے درمیان کوئی چپقلش نہیں، کامران مرتضیٰ
اس موقع پر جے یو آئی کے سینیٹر کامران مرتضیٰ نے کہاکہ عام انتخابات میں دھاندلی ہوئی، اب چونکہ چیف الیکشن کمشنر اور دو ارکان کا تقرر ہونا ہے جس پر تحریک انصاف نے مولانا فضل الرحمان سے مشاورت کی۔
انہوں نے کہاکہ جے یو آئی کوئی بھی فیصلہ جماعت سے مشاورت کے بغیر نہیں کرتی، کسی بھی غلط فہمی سے بچنے کے لیے دونوں جماعتوں نے ایک میکنزم بنایا ہے۔
کامران مرتضیٰ نے کہاکہ رابطوں کے لیے دو رکنی کمیٹی تشکیل دے دی ہے، ہمارے درمیان کوئی چپقلش نہیں ہے۔
یہ بھی پڑھیں ’پی ٹی آئی اور جے یو آئی آئین کو بچانے کے لیے مشترکہ جدوجہد کررہے ہیں‘
انہوں نے مزید کہاکہ مداخلت کی وجہ سے فخرالدین جی ابراہیم جیسا ایماندار چیف الیکشن کمشنر بھی کامیاب نہیں ہو سکا تھا۔
