وزیراعلیٰ پنجاب مریم نواز نے ماحولیاتی تحفظ فورس کے قیام کے موقع پر کہا کہ موسمیاتی تبدیلی سے ماحول بری طرح متاثر ہورہا ہے، ہر سال ہماری فضا میں اسموگ چھا جاتی ہے جس کی وجہ سے بیماریاں پھیلتی ہیں اور اسکولز بند کرنے پڑتے ہیں، میرا خواب تھا کہ اپنے لوگوں کے لیے فضا کو سانس لینے کے قابل بنائیں۔
PAKISTAN'S FIRST
ENVIRONMENTAL PROTECTION FORCE
SPECIALIZED, OPERATIONAL FORCE EQUIPPED WITH MODERN TECHNOLOGY#PollutionFreePunjab pic.twitter.com/dWy0skhi1R
— Government of Punjab (@GovtofPunjabPK) April 16, 2025
وہ لاہور میں انوائرمنٹ پروٹیکشن اسکواڈ کے آغاز کے موقع پر منعقدہ تقریب سے خطاب کر رہی تھیں۔
مریم نواز کا کہنا تھا کہ مریم اورنگزیب کی سربراہی میں ماحولیاتی پالیسی بنائی ہے جو آج ماحولیاتی تحفظ فورس کے قیام کی صورت نظر آرہی ہے، فورس میں ای بائیکس کا اسکواڈ ماحولیات سے متعلق اقدامات کی نگرانی کرے گا۔
انہوں نے کہا گرین اسکواڈ ماحولیاتی قوانین کی خلاف ورزی پر نظر رکھے گا، جب کہ بلیو اسکواڈ پانی کے تحفظ کی نگرانی کرے گا۔ بلیک اسکواڈ گاڑیوں اور ان سے دھوئیں کے اخراج جبکہ ریڈ اسکواڈ صعنتی علاقوں اور اسپتال میں پیدا ہونے والی آلودگی کو مانیٹر کرے گا۔
ان کا کہنا تھا کہ ان اسکواڈز کے پاس 360 ڈگری کے جدید کیمرے اور ڈرونز بھی ہوں گے، ہم نے پنجاب میں زیرو پلاسٹک مہم چلائی ہے جسے دوسرے صوبے بھی اپنا رہے ہیں، موبائل ایئر کوالٹی اسٹیشنز کی تعداد 3 سے بڑھاکر 30 کردی ہے۔
یہ بھی پڑھیے: پاکستان کو غیر معمولی موسمیاتی تباہ کاریوں کا سامنا ہے، وزیراعظم کا بین الاقوامی ماحولیاتی کانفرنس سے خطاب
ان کا کہنا تھا کہ میں مریم اورنگزیب کو شاباش دیتی ہوں کہ انہوں نے میرے خواب کو حقیقت بنایا، یہ ایک بڑی خدمت ہے کہ عوام کے لیے فضا کو صاف بنائیں۔
وزیراعلیٰ نے کہا کہ جب سے ہم نے اقتدار سنبھالا لاکھوں درخت لگا چکے ہیں اور بھی لگا رہے ہیں، وزارت ماحولیات کو جدید گاڑیاں دیں، ہمارے آنے سے پہلے اس وزارت کے پاس ٹوٹی پھوٹی اور زنگ آلود گاڑیاں تھیں، یہی حالت پورے پاکستان کی تھی، اب جب ہم آئے ہیں تو پاکستان کی حالت بھی بدل چکا ہے۔
مریم نواز نے کہا کہ ایک سال کے اندر وزیراعظم شہباز شریف نے جو محنت کی ہے اس وجہ سے آج ڈیفالٹ کی باتیں نہیں ہورہیں، آج ادارے پاکستان کی ریٹنگز کو بہتر قرار دے رہے ہیں، کہا گیا کہ پاکستان ترسیلات زر نہ بھیجیں مگر اس بار ریکارڈ ترسیلات زر بھیجی گئی ہیں۔
انہوں نے کہا کہ آج پچھلے سالوں میں مہنگائی کم ترین سطح پر ہے، بجلی کی قیمتوں میں کمی ہوئی ہے، روٹی جو 30 روپے کی تھی آج 12 روپے کی ہے، رمضان میں ہم نے دروازے کھٹکاکر لوگوں کو 10، 10، ہزار روپے دیے۔
یہ بھی پڑھیے: پنجاب میں کوئی منصوبہ محکمہ ماحولیات کی منظوری کے بغیر شروع نہیں ہوگا، لاہور ہائیکورٹ کاحکم
وزیراعلیٰ نے کہا کہ آپ کو پورے پنجاب میں ستھرا پنجاب کی فورس نظر آئے گی، صفائی میں بہتری آئی ہے، پنجاب میں لا اینڈ آرڈر کی صورتحال بہتر بنانے کے لیے کام کررہے ہیں، میں نے 100 ارب روپے مفت ادویات کے لیے مختص کیے ہیں، اس کے باوجود مریضوں سے پرائیوٹ میڈیکل اسٹورز سے دوائی خریدوانے والے ڈاکٹروں کو برداشت نہیں کروں گی۔
ان کا کہنا تھا کہ ‘اپنی چھت اپنا گھر’ اسکیم میں 30 ہزار لوگوں نے قرضہ لیا ہے، 26 ہزار گھر مکمل ہونے والے ہیں جبکہ 2 ہزار گھر مکمل ہوگئے ہیں، اگر اس ملک کو فتنے کے بغیر 5 سال مل گئے تو یہ ملک ترقی کرے گا، اس ملک میں ترقی کے بہت سارے مواقع ہیں۔
