وزیراعظم محمد شہباز شریف کی زیر صدارت قومی سلامتی کمیٹی کے ہنگامی اجلاس میں بھارتی حملوں کے بعد کی صورتحال، عسکری جوابی کارروائی، اور آئندہ کے لائحہ عمل پر غور کیا گیا۔
ذرائع کے مطابق اجلاس میں اعلیٰ فوجی حکام، وفاقی وزرا اور حساس اداروں کے سربراہان شریک ہیں۔ عسکری حکام نے بھارت کے حملوں اور پاکستان کی مؤثر جوابی کارروائی پر تفصیلی بریفنگ دی۔
اجلاس کو بتایا گیا کہ پاکستان نے فوری ردعمل میں بھارتی فوجی تنصیبات کو کامیابی سے نشانہ بنایا، جس میں بھارت کے 5 جنگی طیارے مار گرائے گئے اور ایک بریگیڈ ہیڈکوارٹر تباہ کر دیا گیا۔
مزید پڑھیں: پاک فضائیہ کا بھرپور جواب: 3 رافیل سمیت بھارت کے 5 جنگی طیارے اور ڈرون مار گرائے، آئی ایس پی آر
قومی سلامتی کمیٹی نے مسلح افواج کی بروقت اور بھرپور جوابی کارروائی پر انہیں خراجِ تحسین پیش کیا۔ وزیراعظم شہباز شریف نے کہا کہ پوری قوم اپنی بہادر افواج کے ساتھ کھڑی ہے اور پاکستان کی خودمختاری، سالمیت اور وقار پر کوئی آنچ نہیں آنے دی جائے گی۔
اجلاس میں سفارتی سطح پر اقدامات، عالمی برادری سے رابطوں، اور بھارت کی جارحیت کو بے نقاب کرنے کے لیے جامع حکمت عملی پر بھی مشاورت کی گئی۔
ذرائع کا کہنا ہے کہ وزیراعظم شہباز شریف آج قوم سے اہم خطاب کریں گے جس میں وہ قومی سلامتی کمیٹی کے فیصلوں اور پاکستان کی آئندہ حکمت عملی سے قوم کو آگاہ کریں گے۔
