چیف جسٹس یحییٰ آفریدی اور سپریم کورٹ ججز کی بھارتی حملے کی مذمت
سپریم کورٹ ججز کا چیف جسٹس کی صدارت میں اجلاس ہوا، جس میں تمام ججز نے بھارت کی جانب سے غیر انسانی حملوں کے نتیجے میں بے گناہ پاکستانی شہریوں کی شہادت پر اظہار افسوس کیا۔
تمام ججز نے بھارت کی جانب سے بلااشتعال حملوں کے نتیجے میں انسانی جانوں کے ضیاع پر گہرے دکھ کا اظہار اور غمزدہ خاندانوں کے ساتھ تعزیت کی۔
اُنہوں نے شہیدوں کے درجات کی بلندی اور غمزدہ خاندانوں کے لیے صبر جمیل کی دعا کی۔
سپریم کورٹ اعلامیے میں کہا گیا ہے کہ سپریم کورٹ اس گھڑی پاکستانی عوام اور متاثرہ خاندانوں کے ساتھ اظہار یکجہتی کرتی ہے اور انسانی تکریم، بے گناہ لوگوں کی زندگیوں کی حفاظت کے لئے اپنے غیر متزلزل عزم کا اعادہ کرتی ہے۔
