ایران کے صدر ڈاکٹر مسعود پزشکیان 2 روزہ سرکاری دورے پر پاکستان پہنچ گئے۔ ان کے ہمراہ وزیر خارجہ عباس عراقچی سمیت اعلیٰ سطح کا وفد بھی موجود ہے۔ اس دورے کا مقصد پاکستان کے ساتھ تجارتی و سفارتی تعاون کو وسعت دینا اور دو طرفہ تعلقات میں نئی توانائی بھرنا ہے۔
وزیر اعظم شہباز شریف نے خود اسلام آباد پہنچنے پر ایرانی صدر کا استقبال کیا۔ ان کے ساتھ نائب وزیراعظم اسحاق ڈار، وفاقی وزیر اطلاعات عطااللہ تارڑ اور دیگر اعلیٰ حکام بھی موجود تھے۔ ایرانی صدر کو سرخ قالین استقبال کے ساتھ 21 توپوں کی سلامی بھی دی گئی۔
ایرانی صدر مسعود پزشکیان اسلام آباد پہنچ گئے ، وزیراعظم شہباز شریف نے معزز مہمان کا استقبال کیا نائب وزیراعظم اسحاق ڈار اور وزیراطلاعات عطا تارڑ بھی ساتھ موجود تھے pic.twitter.com/RR3qGr1kyd
— WE News (@WENewsPk) August 2, 2025
یہ بھی پڑھیں:ایران ہمسایہ ممالک سے گہرے تعلقات کا خواہاں ہے، ایرانی صدر مسعود پزشکیان
دورے کا آغاز لاہور سے ہوا، جہاں صدر مسعود پزشکیان کو مسلم لیگ (ن) کے قائد میاں نواز شریف اور وزیراعلیٰ پنجاب مریم نواز نے خوش آمدید کہا۔ لاہور میں ایرانی وفد نے شاعر مشرق علامہ اقبالؒ کے مزار پر حاضری دی، جبکہ شہر بھر میں سیکیورٹی کے سخت ترین انتظامات کیے گئے۔
دفتر خارجہ کے مطابق ڈاکٹر مسعود پزشکیان کا یہ بطور صدر پہلا دورہ پاکستان ہے۔ یہ دورہ ایک ایسے وقت میں ہو رہا ہے جب پاکستان نے حالیہ دنوں میں ایران کے ساتھ علاقائی یکجہتی اور باہمی تعاون کے عزم کا اظہار کیا ہے، جسے ماہرین بدلتی عالمی صورت حال کے تناظر میں انتہائی اہم قرار دے رہے ہیں۔
ایرانی وزیر خارجہ عباس عراقچی نے بھی اسلام آباد میں وزیر خارجہ اسحاق ڈار سے ملاقات کی، جس میں دوطرفہ تعلقات، علاقائی سلامتی اور اقتصادی تعاون جیسے اہم امور پر تبادلہ خیال کیا گیا۔
صدر پزشکیان اپنے قیام کے دوران صدر مملکت آصف علی زرداری اور وزیر اعظم شہباز شریف سے علیحدہ علیحدہ ملاقاتیں کریں گے، جن میں دو طرفہ تعلقات کو مزید مضبوط بنانے پر گفتگو ہوگی۔
واضح رہے کہ وزیر اعظم شہباز شریف نے مئی کے آخر میں ایران کا دورہ کیا تھا، جہاں انہوں نے ڈاکٹر مسعود پزشکیان سے ملاقات کی تھی۔ اس وقت ایران کے نئے صدر کا منصب سنبھالنے کے بعد یہ ان کی پاکستان کے لیے اولین سفارتی سرگرمی ہے۔
یہ بھی پڑھیں:اسرائیلی حملے میں ایرانی صدر پزشکیان کے زخمی ہونے کا انکشاف، ایرانی میڈیا کی تصدیق
ڈاکٹر مسعود پزشکیان گزشتہ 2 برسوں میں پاکستان کا دورہ کرنے والے دوسرے ایرانی صدر ہیں۔ ان سے قبل سابق صدر ابراہیم رئیسی نے اپریل 2024 میں اسلام آباد کا دورہ کیا تھا، جو ان کی ناگہانی وفات سے محض ایک ماہ قبل عمل میں آیا تھا۔
