امریکی ٹیکنالوجی کمپنی ایپل اپنی سالانہ تقریب ’آ ڈروپنگ 9‘ ستمبر کو منعقد کر رہی ہے، جس میں نئی مصنوعات کی رونمائی متوقع ہے۔
اس تقریب میں سب سے زیادہ توجہ آئی فون 17 سیریز پر ہوگی جس کے 4 ماڈلز پیش کیے جانے کا امکان ہے، جن میں ایک بالکل نیا ماڈل آئی فون 17 ایئر بھی شامل ہے۔
میڈیا رپورٹس کے مطابق مذکورہ آئی فون کمپنی کا اب تک کا سب سے پتلا ڈیوائس ہوگا جس کی موٹائی محض 5.5 ملی میٹر ہوگی۔
یہ بھی پڑھیں: ایپل کے ورچوئیل اسسٹنٹ کو گوگل کا جیمینی اے آئی چلائے گا، رپورٹ
رپورٹس کے مطابق آئی فون 17 پرو اور پرو میکس میں ایپل کی طاقتور اے 19 پرو چپ نصب ہوگی اور کیمرہ سسٹم مزید بہتر بنایا جائے گا۔
کمپنی 2 سال بعد ایک بار پھر ایلومینیم فریم استعمال کرے گی تاکہ فون کی گرمی کم کی جا سکے، نیا ماڈل آئی فون 17 ایئر صرف ای سم کے ساتھ دستیاب ہوگا، کیونکہ اس میں فزیکل سم کارڈ سلوٹ شامل نہیں کیا جائے گا۔
اس سالنہ تقریب میں ایپل واچ کی نئی سیریز بھی متعارف کرائے جانے کا امکان ہے، ایپل واچ سیریز 11 اور ایپل واچ الٹرا 3 بڑی اسکرین، بہتر بیٹری اور ممکنہ سیٹلائٹ کنیکٹیویٹی جیسی خصوصیات کے ساتھ پیش کی جا سکتی ہیں۔
مزید پڑھیں: ایپل سستا ترین میک بک لانچ کرنے کے لیے تیار، ممکنہ قیمت کیا ہوگی؟
اسی تقریب میں ایئر پوڈز پرو 3 بھی متعارف کیے جانے کی توقع ہے، جن میں نئی ایچ 3 چپ، مزید مؤثر شور منسوخی اور دل کی دھڑکن چیک کرنے جیسی خصوصیات شامل ہو سکتی ہیں۔
ایپل اپنے نئے آپریٹنگ سسٹم آئی او ایس 26 کا اعلان بھی کر سکتا ہے، جس میں جدید ڈیزائن اور مصنوعی ذہانت پر مبنی فیچرز شامل ہوں گے۔ کمپنی کی نئی ایپل انٹیلیجنس ٹیکنالوجی سے ورچوئل اسسٹنٹ سری کو بھی مزید طاقتور بنایا جائے گا۔
تقریب کے بعد نئے آئی فونز کے پری آرڈر 12 ستمبر سے شروع ہونے اور 19 ستمبر تک مارکیٹ میں دستیابی متوقع ہے۔
