عمران خان کی گرفتاری کے بعد پی ٹی آئی کی جانب سے راولپنڈی میں میٹرو بس کے 4 اسٹیشنز کی تباہی سے 14 کروڑ 50 لاکھ کا نقصان ہوا۔
کمشنر راولپنڈی کی قائم کردہ انسپکشن کمیٹی نے اپنی رپورٹ کمشنر کی پیش کر دی۔ رپورٹ میں بتایا گیا ہے کہ سب سے زیادہ نقصان سکستھ روڈ میٹرو اسٹیشن کو پہنچایا گیا جو مکمل طور پر تباہ ہو گیا۔
میٹرو اسٹیشن ختم نبوت، میٹرو اسٹیشن فیض آباد اور میٹرو اسٹیشن کمیٹی چوک پر بھی پی ٹی آئی کے حملہ آوروں نے توڑ پھوڑ کی اور آگ لگا کر نقصان پہنچایا۔ تباہی کے نتیجے میں ان اسٹیشنز کا نظام متاثر ہوا۔ مظاہرین نے میٹرو اسٹیشنز کی قیمتی اشیا چرالیں اور ٹکٹنگ سسٹم بھی ناکارہ بنا دیا۔
رپورٹ میں بتایا گیا ہے کہ حملہ آوروں نے سکستھ روڈ اسٹیشن کو 10 کروڑ سے زیادہ کا نقصان پہنچایا۔ ختم نبوت اسٹیشن کو ڈیڑھ کروڑ، فیض آباد اسٹیشن کو 50 لاکھ اور کمیٹی چوک اسٹیشن کو ایک کروڑ 15 لاکھ سے زیادہ نقصان ہوا۔
