آئی سی سی ویمنز ورلڈ کپ 2025 میں آج بھارت اور پاکستان کی ٹیمیں آمنے سامنے ہوں گی، لیکن میدان میں اترنے سے پہلے ہی سیاسی تنازع نے کرکٹ کے اس بڑے مقابلے کو گھیر لیا ہے۔
میچ سری لنکا کے آر. پریماداسا اسٹیڈیم، کولمبو میں صبح 09:30 جی ایم ٹی پر کھیلا جائے گا، تاہم ماہرین کا کہنا ہے کہ اس بار اصل توجہ بیٹنگ یا بولنگ پر نہیں بلکہ دونوں ٹیموں کے کپتانوں، فاطمہ ثناء (پاکستان) اور ہرمن پریت کور (بھارت) — کے ممکنہ ’ہینڈ شیک‘ پر ہوگی۔
سیاسی کشیدگی نے ماحول گرما دیا
بھارت اور پاکستان کے درمیان جاری دشمنی کے باعث یہ اندیشہ ظاہر کیا جا رہا ہے کہ دونوں ٹیموں کے درمیان میچ کے آغاز یا اختتام پر روایتی مصافحہ نہیں ہوگا۔
یہ بھی پڑھیں:پاکستانی ویمن ٹیم بھارت سے ورلڈ کپ ٹاکرے کے لیے تیار، اعتماد ہتھیار ہے، پاکستانی کپتان فاطمہ ثنا
بھارتی کرکٹ بورڈ (بی سی سی آئی) کے سیکرٹری دیواجیت سائقیا نے برطانوی نشریاتی ادارے سے گفتگو میں کہا کہ میں کچھ یقین سے نہیں کہہ سکتا، نہ ہاتھ ملانے کا وعدہ کر سکتا ہوں، نہ گلے ملنے کا۔ ہمارے تعلقات میں کوئی تبدیلی نہیں آئی۔
Captain Fatima Sana wants Pakistan to play to their strengths in today's #CWC25 match against India.
More 👉 https://t.co/Vhd0GC2qUR pic.twitter.com/rrEPEjA5tu
— ICC Cricket World Cup (@cricketworldcup) October 5, 2025
یہ صورتحال گزشتہ سال کے ایشیا کپ 2025 کی یاد دلاتی ہے، جہاں بھارتی مردوں کی ٹیم نے تینوں میچوں میں پاکستانی کھلاڑیوں سے ہاتھ ملانے سے گریز کیا تھا، جس پر عالمی سطح پر شدید ردعمل آیا تھا۔
ہم کھیل پر توجہ دینا چاہتے ہیں، فاطمہ ثنا
پاکستانی کپتان فاطمہ ثنا کا کہنا ہے کہ ٹیم سیاست سے توجہ ہٹا کر صرف کرکٹ پر مرکوز رکھنا چاہتی ہے۔
فاطمہ ثنا کے مطابق ہم جانتے ہیں ہمارے اردگرد کیا ہو رہا ہے، لیکن ہمارا مقصد کھیل پر توجہ رکھنا ہے۔ ورلڈ کپ ایک ایسا موقع ہوتا ہے جس کا ہر کھلاڑی کو انتظار رہتا ہے۔
انہوں نے مزید کہا کہ پاکستان اپنی پہلی شکست (بنگلہ دیش کے خلاف) کے بعد واپسی کے لیے پرعزم ہے۔
’صرف کھیل پر دھیان‘،بھارت کا مؤقف
بھارتی بولنگ کوچ آوشنکر سالوی نے بھی اسی مؤقف کا اعادہ کرتے ہوئے کہا کہ ٹیم صرف کرکٹ پر توجہ دے رہی ہے۔
#WATCH | Delhi | India vs Pakistan ICC Women’s World Cup match today, former Indian cricketer Sarandeep Singh says, "I am hoping for just one thing, which is victory… Smriti Mandhana is in excellent form… Deepti Sharma bowled well and scored runs too in the last match. The… pic.twitter.com/YRlGPuc5gN
— ANI (@ANI) October 5, 2025
آوشنکر کے مطابق ورلڈ کپ ایک طویل مہم ہے، اس لیے کھلاڑیوں کو ذہنی طور پر متوازن رکھنا ضروری ہے۔ ہم اسے صرف ایک میچ کے طور پر لے رہے ہیں۔
دوستی اور ہنسی مذاق
دلچسپ امر یہ ہے کہ 2022 کے ویمنز ورلڈ کپ میں دونوں ٹیموں کے درمیان ماحول بالکل مختلف تھا۔ اُس وقت پاکستان کی سابق کپتان بسمہ معروف اپنی ننھی بیٹی فاطمہ کے ساتھ میدان میں آئیں تو بھارتی کھلاڑیوں نے پیار سے گھیر لیا، تصویریں بنائیں اور خوشگوار لمحے بانٹے۔
دنیا کی نظریں اس میچ پر
یہ مقابلہ جنوبی ایشیا سمیت دنیا بھر میں شائقین کی بے پناہ توجہ حاصل کرے گا۔ سری لنکا کے اسٹیڈیم میں بڑی تعداد میں تماشائیوں کی آمد متوقع ہے۔
