بالی ووڈ کی معروف اداکارہ اور کاروباری شخصیت شلپا شیٹھی سے ممبئی پولیس کے اکنامک آفینسز ونگ نے 60 کروڑ روپے کے مبینہ مالیاتی فراڈ کے سلسلے میں ان کی رہائش گاہ پر تقریباً ساڑھے چار گھنٹے تک پوچھ گچھ کی۔ دورانِ تفتیش اداکارہ نے اپنی اشتہاری کمپنی کے بینک اکاؤنٹس میں ہونے والے مبینہ لین دین کی تفصیلات فراہم کیں اور متعدد دستاویزات بھی پولیس کے حوالے کیے جن کی جانچ جاری ہے۔
یہ بھی پڑھیں: بالی ووڈ کے وہ بڑے نام جنہوں نے مشہور ہونے کے لیے اپنے اصل نام تبدیل کردیے
پولیس ذرائع کے مطابق، یہ کارروائی ایک کاروباری شخصیت دیپک کوٹھاری کی شکایت پر کی جا رہی ہے، جنہوں نے الزام عائد کیا ہے کہ شلپا شیٹھی اور ان کے شوہر راج کندرا نے کاروباری توسیع کے نام پر 2015 سے 2023 کے دوران ان سے 60 کروڑ روپے کی رقم حاصل کی، جسے مبینہ طور پر ذاتی اخراجات پر خرچ کیا گیا۔
قبل ازیں، ستمبر میں راج کندرا کا بیان بھی اسی مقدمے کے سلسلے میں ریکارڈ کیا جا چکا ہے۔ پولیس کے مطابق، وہ کئی اہم سوالات کے جوابات دینے سے گریزاں رہے، جس کے باعث انہیں آئندہ ہفتے دوبارہ طلب کیے جانے کا امکان ہے۔
یہ بھی پڑھیں: بگ برادر سے بگ باس تک
تحقیقات میں سامنے آیا ہے کہ مبینہ فراڈ کی رقم کا کچھ حصہ معروف اداکاراؤں بپاشا باسو اور نیہا دھوپیا کو بطور فیس ادا کیا گیا، جبکہ کمپنی کے اکاؤنٹس سے کچھ رقوم براہ راست شلپا شیٹھی، بپاشا باسو، نیہا دھوپیا اور دیگر افراد کے اکاؤنٹس میں منتقل ہوئیں۔ اس کے علاوہ، مالی لین دین کے کچھ شواہد بالاجی انٹرٹینمنٹ سے بھی جوڑے گئے ہیں۔
اکنامک آفینسز ونگ کی تفتیش تاحال جاری ہے اور امکان ہے کہ مزید افراد کو جلد طلب کیا جائے گا۔
