پنجاب کی وزیر اطلاعات عظمیٰ بخاری نے کہا ہے کہ بانی پی ٹی آئی کو جیل کی دیواروں نے ذہنی طور پر مفلوج کر دیا ہے۔
انہوں نے اپنے بیان میں کہا کہ بانی پی ٹی آئی اپنے دورِ حکومت میں جلاد اور فرعون کا کردار ایک ہی وقت میں ادا کر رہے تھے۔
یہ بھی پڑھیں:خیبرپختونخوا میں نیا وزیراعلیٰ علیمہ خان کے کہنے پر لگایا گیا، صوبائی وزیرِ اطلاعات عظمیٰ بخاری
عظمیٰ بخاری نے کہا کہ ماضی میں جس انتشاری جماعت کو موصوف دہشتگرد اور شدت پسند قرار دیتے تھے، آج اسی مذہبی جماعت کے لیے اپنے کارکنوں کو احتجاج کی کال دے رہے ہیں۔
انہوں نے کہا کہ یوٹرن لینے اور بار بار مؤقف تبدیل کرنے پر انہیں شرم بھی نہیں آتی۔
وزیر اطلاعات نے مزید کہا کہ جب آپ کی فائنل کال کو پاکستان ریجیکٹ کر چکا ہے تو اب کس منہ سے کال دیتے ہیں؟ اب پاکستانی عوام یہ سوچنے پر مجبور ہے کہ کیا انتشار پھیلانے کے لیے ان دونوں کا ایجنڈا ایک ہے؟
انہوں نے کہا کہ جس صوبے میں تحریک انصاف کی حکومت ہے وہاں دہشتگردی عروج پر ہے۔ خیبرپختونخوا اس وقت بیڈ گورننس، کرپشن اور دہشتگردی کا مرکز بن چکا ہے۔
عظمیٰ بخاری کا کہنا تھا کہ وہاں امن قائم کرنے کے بجائے انتشار پھیلانے کے لیے حکومتیں تبدیل کی جا رہی ہیں۔
انہوں نے کہا کہ تحریک انصاف کی بطور جماعت پالیسی ڈلیور کرنا نہیں بلکہ انتشار پھیلانا ہے۔
