صدرِ مملکت آصف علی زرداری نے سری لنکا میں شدید بارشوں کے باعث آنے والے سیلاب اور لینڈ سلائیڈنگ سے قیمتی جانوں کے ضیاع اور املاک کو پہنچنے والے نقصان پر گہرے دکھ اور افسوس کا اظہار کیا ہے۔
صدرِ مملکت نے جاں بحق افراد کے لواحقین سے دلی ہمدردی اور تعزیت کا اظہار کرتے ہوئے زخمیوں کی جلد صحت یابی کی دعا کی۔
یہ بھی پڑھیں: سری لنکا میں سیلاب کے باعث ہلاکتیں 56 تک پہنچ گئیں، دفاتر اور اسکولز بند
انہوں نے اس مشکل وقت میں سری لنکا کے عوام کے ساتھ مکمل یکجہتی کا اظہار کیا اور کہا کہ پاکستان اس کٹھن گھڑی میں سری لنکن بھائیوں کے شانہ بشانہ کھڑا ہے۔
صدر زرداری نے کہا کہ موسمیاتی تبدیلی ایک ناقابلِ تردید حقیقت ہے جو بالخصوص گلوبل ساؤتھ کے ممالک کو شدید متاثر کر رہی ہے، حالانکہ اس ماحولیاتی بگاڑ میں ان کا کردار انتہائی محدود ہے۔
مزید پڑھیں:میکسیکو میں تباہ کن سیلاب، 130 افراد ہلاک یا لاپتا ہوگئے
انہوں نے کہا کہ پاکستان خود بھی موسمیاتی تبدیلی کے سنگین اثرات سے گزر چکا ہے، اس لیے متاثرہ ممالک کے درمیان باہمی تعاون اور مشترکہ حکمتِ عملی انتہائی ناگزیر ہے۔
صدرِ مملکت نے بحران کے وقت ایک دوسرے کی مدد، موسمیاتی لچک، پیشگی تیاری اور تخفیف سے متعلق مشترکہ اقدامات کی ضرورت پر بھی زور دیا۔ انہوں نے سری لنکا کے صدرانورا کمارا ڈسانائیکے کے نام اپنے تعزیتی پیغام میں حکومت اور عوام سے دلی ہمدردی اور افسوس کا اظہار کیا۔
