بنگلہ دیش کے مشیر داخلہ لیفٹیننٹ جنرل (ر) جہانگیر عالم چوہدری نے پولیس کو ہدایت دی ہے کہ عوامی لیگ کے مجرموں کو دیکھتے ہی فوراً گرفتار کیا جائے، اس بات کی جانچ کی ضرورت نہیں کہ ان کے خلاف مقدمات درج ہیں یا نہیں۔
انہوں نے خبردار کیا کہ اگر پولیس نے اس حکم پر عمل نہ کیا تو پولیس کے خلاف کارروائی کی جائے گی۔
بدھ کی سہ پہر نارائن گنج کے علاقے چاشارا میں واقع بنگلہ دیش نٹ ویئر مینوفیکچرز اینڈ ایکسپورٹرز ایسوسی ایشن (بی کے ایم ای اے) کے ہیڈکوارٹر کے سامنے مشیر داخلہ نے یہ بات اس وقت کہی جب اینٹی ڈسکریمینیشن سٹوڈنٹ موومنٹ کے رہنماؤں اور کارکنوں نے انہیں گھیر کر 7 نکاتی مطالبات پیش کیے۔
یہ بھی پڑھیے بنگلہ دیش: نوجوان سیاسی رہنما پر فائرنگ کے بعد سیکیورٹی سخت، 2 افراد گرفتار
جہانگیر عالم چوہدری نے کہا ’عوامی لیگ کے مجرموں کے خلاف مقدمات دیکھنے کی کوئی ضرورت نہیں۔ جہاں نظر آئیں، فوراً قانون کے دائرے میں لایا جائے۔ بصورت دیگر پولیس کے خلاف کارروائی ہوگی۔‘
طلبہ تحریک کے 7 مطالبات
مظاہرین کے 7 نکاتی مطالبات میں شامل ہیں:
جولائی تحریک کے دوران لوٹے گئے ہتھیاروں کی بازیابی۔
شریف عثمان ہادی پر فائرنگ کے مرکزی ملزم کی گرفتاری۔
اینٹی ڈسکریمینیشن سٹوڈنٹ موومنٹ سے متعلق قتل کے مقدمات کی مبینہ مالی منفعت کی بنیادوں پر کارروائی روکنا۔
عوامی لیگ کے مجرموں کی رہائی کے لیے مبینہ لابنگ بند کرنا۔
جرائم پیشہ گروہوں کا خاتمہ اور منشیات کی روک تھام۔
سرحدی سلامتی کو مضبوط بنانا اور سرحد پر ہلاکتوں کی روک تھام۔
یہ بھی پڑھیے: ڈھاکہ، انقلاب منچہ کے ترجمان عثمان ہادی پر حملے کے ملزمان کی شناخت ہوگئی
مظاہرین نے مشیر داخلہ کو بتایا کہ علاقے میں اب بھی عوامی لیگ کے متعدد افراد موجود ہیں اور پولیس یہ کہہ کر کارروائی سے گریز کر رہی ہے کہ ان کے خلاف کوئی مقدمہ درج نہیں۔ اس پر جہانگیر عالم چوہدری نے واضح کیا کہ مقدمات کی تصدیق کی ضرورت نہیں اور پولیس نے کارروائی نہ کی تو اس کے خلاف سخت ایکشن لیا جائے گا۔
صحافیوں کے سوالات اور وضاحت
جب صحافیوں نے ہتھیاروں سے متعلق سوالات کیے تو مظاہرین نے استفسار کیا کہ مشیر داخلہ نے آلوؤں کے بارے میں کیوں بات کی۔ اس پر جہانگیر عالم چوہدری نے وضاحت کی کہ یہ پروگرام وزارتِ زراعت کے تحت منعقد کیا گیا تھا اور کسانوں کے مسائل کو اکثر نظر انداز کر دیا جاتا ہے۔ انہوں نے کہا کہ ان کے پاس وزارتِ زراعت کی ذمہ داری بھی ہے۔
مطالبات جائز، اقدامات جاری
مشیر داخلہ نے مظاہرین کو یقین دلایا کہ ان کے مطالبات جائز ہیں اور ان میں سے کئی پر پہلے ہی اقدامات کیے جا چکے ہیں۔
انہوں نے بتایا کہ شریف عثمان ہادی کی حالت تشویشناک ہے اور سب سے ان کی صحت یابی کے لیے دعا کی اپیل کی۔
انہوں نے مزید کہا کہ فائرنگ کے مرکزی ملزم کو ابھی تک گرفتار نہیں کیا جا سکا، تاہم واردات میں استعمال ہونے والا ہتھیار برآمد کر لیا گیا ہے اور مرکزی ملزم کے ایک ساتھی کو گرفتار کر کے ریمانڈ پر دیا گیا ہے۔
