پاکستان ہاکی ٹیم کے منیجر انجم سعید کو مبینہ طور پر دورانِ پرواز سگریٹ نوشی کے الزام میں طیارے سے اتار دیے جانے کی اطلاعات سامنے آئی ہیں۔
میڈیا رپورٹس کے مطابق قومی ہاکی ٹیم ارجنٹینا سے وطن واپسی پر تھی اور اس دوران ان کی پرواز نے برازیل میں ٹرانزٹ اسٹاپ کیا۔
رپورٹس میں کہا گیا ہے کہ طیارہ رکنے کے بعد انجم سعید نے سگریٹ نوشی کی، جس پر ایئرلائن کے عملے نے واقعے کی اطلاع سیکیورٹی حکام کو دی۔ شکایت کے بعد سیکیورٹی اہلکاروں نے سخت قوانین کے تحت کارروائی کرتے ہوئے انجم سعید کو طیارے سے آف لوڈ کر دیا۔
یہ بھی پڑھیے: پاکستان کو کم از کم ایک سپورٹس یونیورسٹی کی سخت ضرورت کیوں ہے؟
رپورٹس میں بتایا گیا ہے کہ قومی ٹیم کے دیگر کھلاڑیوں اور آفیشلز کی بار بار درخواستوں کے باوجود سیکیورٹی حکام نے اپنا فیصلہ واپس نہیں لیا۔ اس دوران ٹیم کے منیجر کے ساتھ ایک کھلاڑی کو بھی آف لوڈ کیا گیا، جبکہ باقی ٹیم اپنی پرواز کے ذریعے پاکستان روانہ ہو گئی۔
قومی ہاکی ٹیم 2 روز قبل پاکستان واپس پہنچی، جبکہ انجم سعید اور مذکورہ کھلاڑی گزشتہ شب وطن پہنچے۔ رپورٹس میں دعویٰ کیا گیا ہے کہ انجم سعید کو حراست میں لے کر جرمانہ بھی عائد کیا گیا، بعد ازاں اثر و رسوخ استعمال کیے جانے پر معاملہ جرمانے کے ساتھ نمٹا دیا گیا۔
دوسری جانب انجم سعید نے ان تمام الزامات کی تردید کی ہے۔ ان کا کہنا ہے کہ کسی قسم کی سگریٹ نوشی کا کوئی واقعہ پیش نہیں آیا۔ انہوں نے وضاحت کی کہ وہ ایک کھلاڑی کے ہمراہ دبئی میں کام سے متعلق امور کی وجہ سے رکے تھے۔
