ریاض تھیٹر فیسٹیول کا تیسرا ایڈیشن پیر کی شام کامیابی کے ساتھ اختتام پذیر ہو گیا۔ اس فیسٹیول کا انعقاد تھیٹر اینڈ پرفارمنگ آرٹس کمیشن نے قومی تھیٹر سرگرمیوں کے فروغ، تھیٹر کے شعبے سے متعلق آگاہی میں اضافے اور سعودی تھیٹر صلاحیتوں کو بااختیار بنانے کے لیے کیا۔
فیسٹیول کا آغاز 15 دسمبر کو ہوا، جس میں ثقافتی اور فنی سرگرمیوں کا ایک جامع سلسلہ شامل تھا۔ مختلف تھیٹر پرفارمنسز کے ذریعے تخلیقی تجربات، ہدایت کاری کے منفرد انداز اور سماجی و فکری موضوعات پیش کیے گئے، جو سعودی تھیٹر کے ارتقا اور جدید رجحانات کی بھرپور عکاسی کرتے ہیں۔
فیسٹیول کی جیوری نے تیسرے ایڈیشن کے فاتحین کا اعلان کیا، جس کے مطابق ابرار الشریف کو ڈرامہ ’جب چیزیں ترتیب میں آتی ہیں‘ کے لیے بہترین تھیٹر میک اپ کا ایوارڈ دیا گیا، جبکہ جلیلہ الصالحي نے ڈرامہ ’الصرام‘ کے لیے بہترین ملبوسات کا اعزاز حاصل کیا۔
یہ بھی پڑھیں ریاض سیزن 2025 کی دھوم، 80 لاکھ سے زائد افراد کی شرکت
ڈرامہ ’الصرام‘ نے بہترین موسیقی کا ایوارڈ جیتا، محمد عبدالرؤف الیوسف کو ’یہاں تک کہ امید ختم ہو جائے‘ کے لیے بہترین لائٹنگ ڈیزائن کا ایوارڈ دیا گیا، جبکہ ڈرامہ ’التعطیل‘ کو بہترین اسٹیج ڈیزائن کا اعزاز حاصل ہوا۔
اداکاری کے شعبے میں عبداللہ الترکی کو بہترین مرکزی اداکار، معالم حسین آل ابراہیم کو بہترین مرکزی اداکارہ، جواد الصانغ کو بہترین معاون اداکار، جبکہ مروہ الشافعی کو بہترین معاون اداکارہ قرار دیا گیا۔
ڈرامہ ’التعطیل‘ کے مصنفین ماجد السيہاتی اور اشراق الروقي کو بہترین اسکرپٹ کا ایوارڈ دیا گیا، جبکہ سلطان النوہ کو ڈرامہ ’الصرام‘ پر بہترین ہدایت کار کا اعزاز ملا۔ اسی ڈرامے کو بہترین مکمل تھیٹر پروڈکشن بھی قرار دیا گیا۔
یہ بھی پڑھیے ریاض سیزن میں مسٹر بیسٹ کا ’بیسٹ لینڈ‘ زون کھل گیا، لاکھوں ریال کے انعامات
فیسٹیول کے دوران تھیٹر شوز، تربیتی ورکشاپس، تنقیدی نشستیں اور مکالماتی سیشنز منعقد ہوئے، جن میں شائقین کی بھرپور شرکت دیکھنے میں آئی۔
اس موقع پر سعودی تھیٹر کے بانی فنکار ابراہیم الحمدان اور عبدالرحمن المریخی (مرحوم) کو ان کی نمایاں خدمات کے اعتراف میں خراجِ تحسین بھی پیش کیا گیا۔
ریاض تھیٹر فیسٹیول ایک سالانہ ثقافتی پلیٹ فارم کے طور پر سعودی تخلیقی صلاحیتوں کو اجاگر کرتا ہے اور قومی ثقافتی شناخت کے فروغ میں اہم کردار ادا کر رہا ہے۔
