دنیا کی پہلی اڑنے والی کار کی مینوفیکچرنگ شروع، قیمت کیا ہوگی؟

جب دنیا ابھی سیلف ڈرائیونگ گاڑیوں کے مسائل سے نبرد آزما ہے، ایسے میں ایک امریکی کمپنی نے ایک قدم آگے بڑھتے ہوئے دنیا کی پہلی فلائنگ کار کی باقاعدہ تیاری شروع کر دی ہے۔

کیلیفورنیا کے شہر سان میٹیو میں قائم کمپنی Alef Aeronautics نے اعلان کیا ہے کہ اس نے دسمبر 2025 کے آغاز میں اپنی فلائنگ کار Alef Model A کی مینوفیکچرنگ شروع کر دی ہے۔

ایک دہائی کی محنت

Alef Aeronautics کی بنیاد 2015 میں رکھی گئی تھی۔ بانیوں کا خیال تھا کہ یہ منصوبہ 6ماہ میں مکمل ہو جائے گا، مگر حقیقت میں اسے ایک دہائی لگ گئی۔ 2019 میں پہلا فل سائز پروٹوٹائپ تیار ہوا، اور اب جا کر کمرشل تیاری ممکن ہو سکی ہے۔

Alef Model A کیا ہے؟

یہ 100 فیصد الیکٹرک فلائنگ کار ہے۔ اس کی سڑک پر چلنے کی صلاحیت زیادہ سے زیادہ رفتار 25 میل فی گھنٹہ ہے۔  یہ ہیلی کاپٹر کی طرح عمودی ٹیک آف اور لینڈنگ کرے گی۔  فلائینگ کار عام پارکنگ اسپیس میں کھڑی کی جا سکتی ہے۔

دنیا کی پہلی روڈ لیگل فلائنگ کار

یہ گاڑی 8پروپیلرز پر مشتمل ہے جو ایک میش نما فریم میں نصب ہیں۔ فضا میں اُڑتے وقت گاڑی کا ڈھانچہ گھوم جاتا ہے، اطراف کے حصے پروں کی شکل اختیار کر لیتے ہیں اور ڈرائیور کی سیٹ کاک پٹ جیسی ہو جاتی ہے۔

فلائنگ کار کی قیمت کیا ہوگی اور مانگ کتنی ہے؟

اس کی متوقع قیمت 299,000 ڈالر ہے۔ اب تک فلائینگ کار کے 3,500 آرڈرز کمپنی کو مل چکے ہیں۔

کمپنی کا دعویٰ ہے کہ بڑے پیمانے پر پیداوار کے بعد قیمت عام کمپیکٹ کار کے قریب آ سکتی ہے۔

 فلائنگ کار کا آرڈر کیسے کریں؟

نارمل وقت میں شامل لوگوں کو اس کے لیے  $150 ڈاؤن پیمنٹ کرنا ہوگی جبکہ ارجنٹ حصول کے خواہش مندوں کو  $1,500 ڈاؤن پیمنٹ کرنا ہوگی۔ ابتدائی خریداروں کو بیٹا ٹیسٹرز کے طور پر گاڑی ملے گی۔

سب سے بڑی رکاوٹ: قوانین

اس وقت فلائنگ کارز کے لیے واضح قوانین موجود نہیں ہیں۔ اس لیے کچھ سوالات جواب طلب ہیں۔ مثلاً کیا ڈرائیور کو پائلٹ لائسنس چاہیے ہوگا؟ گاڑی کو کار، ڈرون یا ہوائی جہاز سمجھا جائے گا؟ فضائی ٹریفک کنٹرول کیسے ہوگا؟ یہ تمام سوالات ابھی جواب طلب ہیں۔

Alef Model A محض ایک گاڑی نہیں بلکہ ٹرانسپورٹ کے مستقبل کی جھلک ہے۔ اگر قوانین، حفاظت اور لاگت کے مسائل حل ہو گئے تو آنے والے برسوں میں فلائنگ کارز سڑکوں ہی نہیں، آسمانوں پر بھی عام نظر آ سکتی ہیں۔