وفاقی وزیرِ خزانہ و محصولات سینیٹر محمد اورنگزیب نے عالمی اقتصادی فورم کے سالانہ اجلاس کے موقع پر ڈیووس میں سعودی عرب کے وزیرِ سرمایہ کاری خالد الفالح سے ملاقات کی۔
ریڈیو پاکستان کے مطابق ملاقات میں دونوں ممالک کے درمیان جاری تعاون کا جائزہ لیا گیا اور مختلف شعبوں میں موجودہ اور مجوزہ منصوبوں پر پیش رفت پر تبادلۂ خیال کیا گیا۔
یہ بھی پڑھیے: وزیرِ خزانہ محمد اورنگزیب کی بل گیٹس سے ملاقات، صحت اور اصلاحات میں تعاون بڑھانے پر اتفاق
سعودی وزیرِ سرمایہ کاری نے پاکستان کی اہمیت اور سرمایہ کاری کی وسیع صلاحیت کو سراہتے ہوئے کہا کہ پاکستان قدرتی وسائل، جغرافیائی محلِ وقوع اور ابھرتے ہوئے سرمایہ کاری کے مواقع کے باعث خطے میں ایک نمایاں حیثیت رکھتا ہے۔
انہوں نے پاکستان میں سرمایہ کاری کے امکانات میں گہری دلچسپی کا اظہار بھی کیا۔
ملاقات میں دونوں وزرا نے اس بات پر اتفاق کیا کہ پاکستان اور سعودی عرب کی تکنیکی ٹیمیں مشترکہ ترجیحات کو آگے بڑھانے اور آئندہ ملاقاتوں سے مثبت اور نتیجہ خیز نتائج حاصل کرنے کے لیے قریبی رابطے میں کام کر رہی ہیں۔ اس موقع پر دوطرفہ اقتصادی تعاون کو مزید مضبوط بنانے کے عزم کا اعادہ بھی کیا گیا۔
