پاکستان سپر لیگ کے 11ہویں ایڈیشن سے قبل فرنچائزز نے اپنے ریٹین کھلاڑیوں اور ان کے معاوضوں کی تفصیلات پاکستان کرکٹ بورڈ کو فراہم کر دی ہیں، جس کے بعد سامنے آیا ہے کہ کن کھلاڑیوں کو سب سے زیادہ رقم میں برقرار رکھا گیا۔
یہ بھی پڑھیں:پی ایس ایل 11: فرنچائزز کی جانب سے ریٹین اور ریلیز کیے جانے والے کھلاڑیوں کی فہرست جاری
سب سے زیادہ معاوضے کے حامل کھلاڑیوں میں بابر اعظم، شاہین شاہ آفریدی، ابرار احمد اور شاداب خان شامل ہیں، جنہیں فرنچائزز نے 7-7 کروڑ روپے میں ریٹین کیا ہے۔ یہ چاروں کھلاڑی پی ایس ایل 11 میں اپنی اپنی ٹیموں کی نمائندگی جاری رکھیں گے۔
اسلام آباد یونائیٹڈ نے نیوزی لینڈ کے ڈیون کونوے کو 6 کروڑ 30 لاکھ روپے میں سائن کیا، جبکہ کراچی کنگز نے معین علی کو 6 کروڑ 44 لاکھ روپے میں اپنی ٹیم کا حصہ بنایا۔
کراچی کنگز نے مزید کھلاڑیوں کو بھی مختلف کیٹیگریز میں برقرار رکھا، جن میں حسن علی 4 کروڑ 76 لاکھ روپے میں ریٹین ہوئے۔ اسی طرح عثمان طارق کو 5 کروڑ 60 لاکھ، صفیان مقیم کو 4 کروڑ 48 لاکھ، عباس آفریدی کو 3 کروڑ 8 لاکھ اور عبداللہ شفیق کو 2 کروڑ 20 لاکھ روپے میں ٹیم میں شامل رکھا گیا۔
یہ بھی پڑھیں:پی ایس ایل کے بین الاقوامی میڈیا حقوق فروخت، نیا ریکارڈ قائم
دیگر ریٹین کھلاڑیوں میں خوشدل شاہ 3 کروڑ 36 لاکھ، حسن نواز 3 کروڑ 92 لاکھ، سکندر رضا 2 کروڑ 80 لاکھ اور عبدالصمد 2 کروڑ 8 لاکھ روپے میں ریٹین کیے گئے۔
پی سی بی قوانین کے مطابق تمام فرنچائزز پر لازم تھا کہ وہ ریٹین کیے گئے کھلاڑیوں کے معاوضوں کی تفصیلات مقررہ وقت میں بورڈ کو فراہم کریں، جو اس مرحلے پر مکمل ہو چکا ہے۔
