لاہور سے تعلق رکھنے والے معروف شاعر، نعت گو اور مزاحیہ شاعری کے ممتاز نام سید سلمان گیلانی طویل علالت کے بعد انتقال کر گئے۔ وہ 74 برس کے تھے اور کچھ عرصے سے شیخ زید اسپتال میں زیرِ علاج تھے۔
سید سلمان گیلانی کو مذہبی اور ادبی حلقوں میں خاص مقام حاصل تھا۔ وہ ختمِ نبوت کے پرجوش حامی اور تحریک ختمِ نبوت کے معروف رہنما سید امین گیلانی کے صاحبزادے تھے۔ انہوں نے اپنے والد کی طرح دینِ اسلام، نعت رسولؐ اور سماجی موضوعات پر منفرد انداز میں شاعری کی۔
جے یو آئی سربراہ مولانا فضل الرحمان کا شاعر ختم نبوت سیدسلمان گیلانی کی وفات پر اظہار افسوس
سید سلمان گیلانی مرحوم کی رحلت کی خبر سے دل رنجیدہ وافسردہ ہے ۔مولانا فضل الرحمان
مرحوم کو اللہ کریم نے سوز و گداز سے بھرپور آواز اور دلنشین طرزِ بیان عطا کیا تھا۔مولانا فضل الرحمان… pic.twitter.com/11yynAbWuv
— Jamiat Ulama-e-Islam Pakistan (@juipakofficial) February 21, 2026
سلمان گیلانی اپنی برجستہ مزاحیہ شاعری اور طنزیہ کلام کی بدولت مشاعروں کی جان سمجھے جاتے تھے۔ ان کا اندازِ بیان شائستگی اور شگفتگی کا حسین امتزاج تھا، جس سے محفلیں زعفران زار ہو جاتیں۔ نعتیہ کلام میں بھی ان کی پہچان نمایاں تھی، جس پر انہیں ’شاعرِ ختمِ نبوت‘ کے لقب سے یاد کیا جاتا تھا۔
1951 میں لاہور میں پیدا ہونے والے سید سلمان گیلانی نے پوری زندگی ادب، مذہب اور سماجی شعور کے فروغ کے لیے وقف کیے رکھی۔ ان کی تصنیف ’میری باتیں ہیں یاد رکھنے کی‘ کو بھی قارئین میں پذیرائی ملی، جس میں ان کی یادداشتیں اور مشاہدات شامل ہیں۔
یہ بھی پڑھیں:معروف شاعر سید سلمان گیلانی کا ادبی و دینی سفر
وہ نہ صرف پاکستان بلکہ بیرونِ ملک بھی مشاعروں میں شرکت کرتے رہے اور نعت و ختمِ نبوت کے موضوع پر اپنے خیالات کا اظہار کرتے تھے۔ ان کے انتقال پر ادبی، مذہبی اور سماجی حلقوں میں گہرے رنج و غم کا اظہار کیا جا رہا ہے۔ شعرا، سیاسی و سماجی شخصیات کی جانب سے تعزیتی پیغامات کا سلسلہ جاری ہے۔
مرحوم کے پسماندگان میں ایک بیٹا اور دو بیٹیاں شامل ہیں۔ نمازِ جنازہ کے حوالے سے تاحال کوئی اعلان نہیں کیا گیا۔
مولانا فضل الرحمان کا سید سلمان گیلانی کے انتقال پر اظہارِ افسوس
جے یو آئی کے آفیشل اکاؤنٹ سے جاری بیان میں مولانا فضل الرحمان نے کہا کہ سید سلمان گیلانی مرحوم کی رحلت کی خبر سے دل رنجیدہ اور افسردہ ہے۔ انہوں نے کہا کہ اللہ تعالیٰ نے مرحوم کو سوز و گداز سے بھرپور آواز اور دلنشین طرزِ بیان عطا کیا تھا۔
مولانا فضل الرحمان کے مطابق سید سلمان گیلانی بلند پایہ شاعر، باکمال نعت خواں اور عمدہ نثر نگار تھے۔ انہوں نے کہا کہ مرحوم سچے عاشقِ رسولؐ تھے اور ان کے نعتیہ کلام سے لاکھوں افراد مستفید ہوئے۔
انہوں نے مزید کہا کہ رمضان المبارک کے مقدس اوقات میں ان کا سفرِ آخرت ان کے درجات کی بلندی کا سبب بنے گا۔ مولانا فضل الرحمان نے سید سلمان گیلانی کو اپنے خانوادے کا فرد قرار دیتے ہوئے کہا کہ وہ اہلِ خانہ سے اظہارِ تعزیت کے ساتھ ساتھ خود اور اپنی جماعت کو بھی تعزیت کا مستحق سمجھتے ہیں۔
مولانا فضل الرحمان نے دعا کی کہ اللہ کریم مرحوم کی خدمات کو قبول فرمائے، تمام بشری لغزشوں سے درگزر کرے، انہیں اپنی جوارِ رحمت میں جگہ عطا فرمائے اور پسماندگان کو صبرِ جمیل نصیب کرے۔
