پنجاب میں پہلی مرتبہ میت کی مفت منتقلی سروس کا آغاز کر دیا گیا ہے۔ وزیراعلیٰ پنجاب مریم نواز شریف نے مرحوم کی میت کو اسپتال سے گھر منتقل کرنے کے لیے سرکاری ایمبولینس سروس کی منظوری دے دی ہے۔
وزیراعلیٰ کی زیر صدارت خصوصی اجلاس میں فیصلہ کیا گیا کہ بڑے سرکاری اسپتالوں اور ہر تحصیل میں سرکاری وہیکل سروس فراہم کی جائے گی۔ فیصلے کے مطابق پنجاب کی ہر تحصیل میں کم از کم ایک وین میسر ہوگی جو اسپتال سے گھر تک میت کی مفت منتقلی کی سہولت فراہم کرے گی۔ مرحوم کے اہل خانہ 1122 پر کال کر کے یا اسپتال کے کاؤنٹر سے رابطہ کر کے یہ سروس حاصل کر سکیں گے۔
یہ بھی پڑھیے: ہوٹلز، اسپتال اور کاروباری اداروں کی آن لائن مانیٹرنگ کا فیصلہ، پوائنٹ آف سیلز لازمی قرار
میت منتقلی سروس کی مانیٹرنگ اسمارٹ مینجمنٹ سسٹم کے ذریعے کی جائے گی اور ضرورت پڑنے پر میت کو دوسرے شہر منتقل کرنے کی سہولت بھی مفت فراہم کی جائے گی۔ اجلاس میں سیکریٹری ایمرجنسی سروسز ڈاکٹر رضوان نصیر نے بریفنگ دی اور بتایا کہ اس اقدام کا مقصد عوام کو آسان، شفاف اور مفت سہولت فراہم کرنا ہے۔
مزید برآں، اجلاس میں پرائیویٹ ایمبولینس سروسز کو ریگولرائز کرنے اور ان کے ریٹس مقرر کرنے کی تجویز پر بھی غور کیا گیا تاکہ عوام کو ہر سطح پر مناسب اور شفاف خدمات میسر ہو سکیں۔
