افغان نژاد آسٹریلوی صحافی یلدیٰ حکیم کو برطانیہ کی رائل ٹیلی ویژن سوسائٹی کی جانب سے اسکائی نیوز کے ساتھ ان کے کام کے اعتراف میں ’پریزنٹر آف دی ایئر‘ قرار دیا گیا ہے۔
یہ بھی پڑھیں: عمران خان کے بیٹوں کا اسکائی نیوز کو انٹرویو، ‘ویڈیو بیان میں کونسی بات جھوٹ ہے؟’
اسکائی نیوز نے جمعرات 5 مارچ کو اعلان کیا کہ یلدیٰ حکیم ایوارڈ کی تقریب میں موجود نہیں تھیں اور اس وقت مشرق وسطیٰ سے رپورٹنگ کر رہی ہیں۔
دریں اثنا افغانستان کے سابق صدر حامد کرزئی نے یلدیٰ حکیم کو بین الاقوامی میڈیا میں نمایاں خدمات پر ایوارڈ ملنے پر مبارکباد دی ہے۔
سابق افغان صدر نے سماجی رابطے کی ویب سائٹ ایکس پر جاری بیان میں کہا کہ یلدیٰ حکیم نے دنیا کے بڑے میڈیا پلیٹ فارمز پر اپنی مسلسل اور مؤثر موجودگی کے ذریعے ایک متاثر کن مثال قائم کی ہے۔
انہوں نے اس کامیابی پر یلدیٰ حکیم سمیت ملک کے تمام میڈیا کارکنوں کو مبارکباد دی اور ان کے لیے مزید کامیابیوں کی دعا کی۔
یلدا حکیم@SkyYaldaHakim، با حضور مداوم و معنادار در رسانههای مطرح جهان، نقشی الهامبخش از خود به یادگار گذاشته و از سوی هیئت داوران انجمن سلطنتی تلویزیون@RTS_media ، بهعنوان مجری سال شبکه #اسکاینیوز انتخاب شده است. ضمن قدردانی از تلاشهای ایشان، این دستاورد بزرگ را به خانم… pic.twitter.com/VEifZgxPFa
— Hamid Karzai (@KarzaiH) March 5, 2026
یلدیٰ حکیم اس وقت اسکائی نیوز میں لیڈ ورلڈ نیوز پریزنٹر ہیں اور پروگرام ’دی ورلڈ ود یلدیٰ حکیم‘ کی میزبانی کرتی ہیں۔ وہ گزشتہ برس کے دوران اسرائیل، یوکرین اور مشرقِ وسطیٰ سمیت کئی اہم تنازعات کے علاقوں سے رپورٹنگ کر چکی ہیں اور متعدد عالمی رہنماؤں کے انٹرویوز بھی کر چکی ہیں۔
ایوارڈ کے ججز نے انہیں رواں سال کی بہترین پیشکش اور جنگی علاقوں سے براہ راست رپورٹنگ کے باعث اس اعزاز کا حقدار قرار دیا۔
مزید پڑھیے: حملہ آوروں کے لیے ہمارا جواب بے رحمانہ ہوگا، ڈی جی آئی ایس پی آر کا اسکائی نیوز کو انٹرویو
یاد رہے کہ یلدیٰ حکیم افغانستان کے دارالحکومت کابل میں پیدا ہوئیں اور بعد ازاں اپنے خاندان کے ساتھ آسٹریلیا منتقل ہو گئیں جہاں انہوں نے صحافت کے میدان میں کیریئر کا آغاز کیا۔ وہ بی بی سی سمیت کئی عالمی اداروں میں خدمات انجام دینے کے بعد سنہ 2023 میں اسکائی نیوز سے وابستہ ہوئیں۔
