عالمی شہرت یافتہ گلوکارہ اور بزنس وومن ریحانہ اور امریکی ریپر راکی کے گھر پر فائرنگ کا واقعہ پیش آیا ہے تاہم خوش قسمتی سے اس واقعے میں کوئی جانی نقصان نہیں ہوا۔
غیر ملکی میڈیا کے مطابق اتوار کی دوپہر ایک نامعلوم خاتون نے مبینہ طور پر سڑک کے دوسری جانب کھڑی گاڑی سے جوڑے کی رہائش گاہ پر فائرنگ کی اور موقع سے فرار ہوگئی۔ رپورٹ کے مطابق فائرنگ سفید رنگ کی ٹیسلا گاڑی سے کی گئی۔
یہ بھی پڑھیں: معروف امریکی گلوکارہ برٹنی سپیئرز گرفتار، وجہ کیا بنی؟
غیر ملکی میڈیا رپورٹس کے مطابق ملزمہ نے تقریباً دس گولیاں چلائیں جن میں سے ایک گولی گھر کی دیوار کے اندر جا لگی۔ واقعے کی اطلاع ایمرجنسی نمبر 911 پر دی گئی جس کے بعد پولیس نے موقع پر پہنچ کر تحقیقات شروع کر دیں۔
بعد ازاں پولیس نے ملزمہ کا سراغ لگا کر اسے ایک پارکنگ لاٹ سے گرفتار کر لیا۔ حکام کے مطابق گرفتاری کے دوران کسی قسم کی مزاحمت یا مزید واقعہ پیش نہیں آیا۔
یہ بھی پڑھیں: اسلام قبول کرنے والی امریکی گلوکارہ جینیفر گراؤٹ کی قرآن کی خوبصورت تلاوت، ویڈیو وائرل
میڈیا رپورٹس کے مطابق فائرنگ کے وقت ریحانہ گھر کے اندر موجود تھیں تاہم یہ واضح نہیں کہ راکی یا جوڑے کے تین بچے اس وقت گھر میں تھے یا نہیں۔
حکام اس بات کی تحقیقات کر رہے ہیں کہ مشتبہ خاتون نے اس گھر کو کیوں نشانہ بنایا اور آیا یہ فائرنگ خاص طور پر اس گھرانے کو نشانہ بنا کر کی گئی تھی یا کسی بڑے تنازعے کا حصہ تھی۔
