بھارت کے شہر سورت میں واقع ایک مندر کے بیت الخلا سے دو نوجوان لڑکیوں کی لاشیں برآمد ہوئی ہیں۔ موقع پر ان کے ساتھ اینستھیزیا انجیکشنز اور سرنجیں بھی پائی گئیں۔
پولیس کے مطابق لڑکیوں نے چیٹ جی پی ٹی سے خودکشی کے طریقے تلاش کیے تھے اور ان کے فون میں ایک نرس کی مبینہ خودکشی کی ویڈیو بھی محفوظ تھی۔
یہ بھی پڑھیں: پہلی ملاقات، چیٹ جی پی ٹی نے کیسے خاتون کے سامنے مرد دوست کا کچا چٹھا کھول دیا؟
پولیس کے مطابق لڑکیوں کی عمر 18 اور 20 سال تھی اور وہ بچپن کی دوستیں تھیں۔ ودیا نامی لڑکی فرسٹ ایئر بی کام کی طالبہ اور ادھنا سیکنڈ ایئر بی کام کی طالبہ تھی۔ جمعہ کی صبح دونوں معمول کے مطابق کالج کے لیے گھر سے نکلیں لیکن دوپہر تک واپس نہ آئیں جس پر والدین نے پولیس سے رابطہ کیا۔ والدین کے رابطے کے بعد پولیس نے موبائل فونز اور سی سی ٹی وی فوٹیج کے ذریعے لڑکیوں کا سراغ لگایا۔ ایک لڑکی کی موٹر سائیکل مندر کے باہر پائی گئی۔
پولیس کے مطابق لڑکیوں کے خاندان کے افراد نے مندر کے حکام سے رابطہ کیا گیا اور فوٹیج میں دیکھا کہ لڑکیاں بیت الخلا میں گئی تھیں۔ خاندان کے افراد وہاں پہنچے اور مندر کے حکام کی موجودگی میں بند دروازہ توڑ کر اندر داخل ہوئے۔ اندر لڑکیاں بے ہوش حالت میں پائی گئیں اور انہیں اسپتال لے جایا گیا جہاں ڈاکٹروں نے انہیں مردہ قرار دے دیا۔
یہ بھی پڑھیں: نو عمر لڑکے کی خودکشی: اوپن اے آئی کی جانب سے چیٹ جی پی ٹی پر والدین کا کنٹرول متعارف
پولیس اسپتال پہنچی تو لڑکیوں کے خاندان کے افراد نے 4 بوتلیں اینستھیٹک ادویات، ایک خالی سرنج اور تین انجیکشن پولیس کے حوالے کیے جو انہیں موقع سے ملے تھے۔ پولیس نے دونوں لڑکیوں کے موبائل فونز بھی قبضے میں لے لیے اور مقدمہ درج کر کے تحقیقات شروع کر دی ہیں۔
پولیس کے مطابق ان کے فونز کی جانچ کرنے پر معلوم ہوا کہ انہوں نے چیٹ جی پی ٹی پر ’خودکشی کیسے کی جائے‘ تلاش کیا تھا۔ اس کے علاوہ ان کے موبائل فون سے ایک ویڈیو بھی ملی جس میں ایک نرس کے بارے میں بتایا گیا تھا جو مبینہ طور پر اینستھیزیا انجیکشن کے ذریعے خودکشی کر گئی تھی۔
پولیس کا کہنا ہے کہ لڑکیوں کے موبائل فونز فارنزک سائنس لیبارٹری کے حوالے کر دیے ہیں اور وہ رپورٹ کا انتظار کر رہے ہیں تاکہ ان کے واٹس ایپ چیٹس تک رسائی حاصل کی جا سکے جس سے واقعے کی واضح تصویر مل سکے گی۔
