انگلینڈ کی 100 بالز پر مشتمل کرکٹ لیگ دی ہنڈرڈ میں آئی پی ایل سے منسلک فرنچائز سن رائزرز لیڈز نے پاکستانی لیگ اسپنر ابرار احمد کو اپنی ٹیم کا حصہ بنا لیا۔
سیاسی کشیدگی کے باعث پاکستانی کھلاڑیوں کے نظر انداز کیے جانے کے خدشات کے باوجود جمعرات کو ہونے والی نیلامی میں 27 سالہ ابرار احمد کو ایک لاکھ 90ہزار پاؤنڈ میں خریدا گیا۔
یہ بھی پڑھیں: پاکستانی کھلاڑیوں کو نظر انداز کرنے کی غلطی نہ کریں، انگلینڈ کرکٹ بورڈ نے دی ہنڈرڈ فرنچائزز کو خبردار کردیا
انگلینڈ اینڈ ویلز کرکٹ بورڈ نے گزشتہ ماہ واضح کیا تھا کہ تمام 8 فرنچائزز میں کھلاڑیوں کا انتخاب صرف کارکردگی کی بنیاد پر کیا جائے گا۔
پاکستان اور بھارت کے درمیان طویل سیاسی کشیدگی کے باعث دونوں ممالک صرف عالمی ایونٹس میں ایک دوسرے کے مدمقابل آتے ہیں، جبکہ پاکستانی کرکٹرز 2009 کے بعد سے آئی پی ایل میں شرکت نہیں کرسکے۔
یہ بھی پڑھیں: دی ہنڈرڈ لیگ، کس پاکستانی کھلاڑی کو کتنے پیسے ملیں گے؟
خواتین کی نیلامی میں پاکستان کی فاطمہ ثنا اور سعدیہ اقبال کسی ٹیم کا حصہ نہ بن سکیں، جبکہ مردوں کی نیلامی سے شاہین شاہ آفریدی دستبردار ہوگئے اور حارث رؤف کو 100,000 پاؤنڈ کی بنیادی قیمت پر بھی کوئی خریدار نہ ملا۔
دوسری جانب پاکستانی اسپنر عثمان طارق کو برمنگھم فینکس نے 140,000 پاؤنڈ میں خرید لیا۔
دی ہنڈرڈ لیگ میں پہلی بار ڈرافٹ سسٹم کے بجائے باقاعدہ نیلامی کا انعقاد کیا گیا ہے۔ لیگ کا 2026 ایڈیشن 21 جولائی سے شروع ہو کر چار ہفتے جاری رہے گا، جس میں مردوں اور خواتین دونوں کی ٹیمیں حصہ لیں گی۔
