امریکی صدر ڈونلڈ ٹرمپ نے کہا ہے کہ آبنائے ہرمز کو کھلا اور محفوظ رکھنے کے لیے امریکا اور اس کے اتحادی ممالک مشترکہ اقدامات کریں گے۔ ان کا کہنا ہے کہ اس اہم سمندری گزرگاہ کی حفاظت کے لیے مختلف ممالک اپنے جنگی جہاز بھی علاقے میں بھیج سکتے ہیں۔
یہ بھی پڑھیں:بھارت کا ایران کو دھمکی آمیز پیغام، آبنائے ہرمز میں تھائی جہاز پر حملے کی مذمت
امریکی صدر ڈونلڈ ٹرمپ نے اپنے سوشل میڈیا پلیٹ فارم ٹرتھ سوشل پر جاری پیغام میں کہا ہے کہ کئی ممالک، خاص طور پر وہ جو ایران کی جانب سے آبنائے ہرمز کو بند کرنے کی ممکنہ کوشش سے متاثر ہو سکتے ہیں، امریکا کے ساتھ مل کر اس آبی گزرگاہ کو محفوظ رکھنے کے لیے جنگی جہاز بھیجیں گے۔
"One way or the other, we will soon get the Hormuz Strait OPEN, SAFE, and FREE!" – President DONALD J. TRUMP pic.twitter.com/8XzG2aTmQT
— The White House (@WhiteHouse) March 14, 2026
انہوں نے کہا کہ امریکا پہلے ہی ایران کی فوجی صلاحیت کو مکمل طور پر تباہ کرنے کا دعویٰ کر چکا ہے، تاہم اس کے باوجود ایران کے لیے یہ ممکن ہے کہ وہ ایک یا 2 ڈرون بھیج دے، سمندر میں بارودی سرنگیں بچھا دے یا قریبی فاصلے تک مار کرنے والے میزائل کے ذریعے اس گزرگاہ میں رکاوٹ پیدا کرنے کی کوشش کرے۔
ڈونلڈ ٹرمپ نے امید ظاہر کی کہ چین، فرانس، جاپان، جنوبی کوریا اور برطانیہ سمیت دیگر ممالک بھی اس صورتحال سے متاثر ہونے کے باعث اپنے بحری جہاز اس علاقے میں بھیجیں گے تاکہ آبنائے ہرمز کسی ایک ملک کے لیے خطرہ نہ بن سکے۔
امریکی صدر کے مطابق اس دوران امریکا ساحلی علاقوں میں کارروائیاں جاری رکھے گا اور ایرانی کشتیوں اور جہازوں کو نشانہ بناتا رہے گا۔ ان کا کہنا تھا کہ کسی نہ کسی طریقے سے جلد ہی آبنائے ہرمز کو مکمل طور پر کھلا، محفوظ اور آزاد بنا دیا جائے گا۔
