وینزویلا نے شاندار کارکردگی کا مظاہرہ کرتے ہوئے اٹلی کو 2-4 سے شکست دے کر پہلی مرتبہ ورلڈ بیس بال کلاسک کے فائنل کے لیے کوالیفائی کرلیا، جہاں اس کا مقابلہ امریکا سے ہوگا۔
یہ بھی پڑھیں: پاکستان نے یو اے ای کو شکست دیکر بیس بال یونائیٹڈ عرب کلاسک ٹورنامنٹ جیت لیا
میچ میں کامیابی کے بعد وینزویلا بھر میں جشن کا سماں دیکھنے میں آیا جبکہ کھلاڑیوں نے ڈگ آؤٹ اور ڈریسنگ روم میں رقص اور خوشی کا اظہار کیا۔ ٹیم کے کھلاڑی رونالڈ اکونیا جونیئر، مائیکل گارشیا اور لوئس ارائز نے ساتویں اننگ میں اہم سنگلز اسکور کرکے ٹیم کی فتح میں فیصلہ کن کردار ادا کیا۔
وینزویلا نے میچ کے دوران ابتدائی خسارہ بھی ختم کیا اور بھرپور کم بیک کرتے ہوئے فتح اپنے نام کی۔ اس سے قبل ٹیم نے کوارٹر فائنل میں دفاعی چیمپئن جاپان کو شکست دے کر سیمی فائنل تک رسائی حاصل کی تھی۔
ٹیم منیجر عمر لوپیز کا کہنا تھا کہ بیس بال ان کے ملک کی ثقافت اور خوشی کا حصہ ہے اور کھلاڑی میدان میں اسی جذبے کے ساتھ اترتے ہیں۔ انہوں نے کہا کہ ٹیم کی کامیابی پورے ملک کے لیے باعث فخر ہے۔
یہ بھی پڑھیں: ڈونلڈ ٹرمپ کو بیس بال میچ میں شائقین کی جانب سے شدید مخالفت اور نعرے بازی کا سامنا
یہ پہلا موقع ہے کہ وینزویلا ورلڈ بیس بال کلاسک کے فائنل تک پہنچا ہے۔ اس سے قبل 2009 میں سیمی فائنل میں جنوبی کوریا کے ہاتھوں شکست کے باعث ٹیم فائنل میں جگہ بنانے میں ناکام رہی تھی۔
اب فائنل میں وینزویلا اور امریکا کے درمیان ٹائٹل کے لیے سخت مقابلے کی توقع کی جا رہی ہے۔
