امریکا میں سوشل میڈیا پر تیزی سے مقبول ہونے والی ایک خاتون انفلوئنسر، جسے امریکی صدر ڈونلڈ ٹرمپ کی قریبی حامی اور امریکی فوجی قرار دیا جا رہا تھا، دراصل مصنوعی ذہانت سے تخلیق کیا گیا کردار ثابت ہوئی ہے۔
یہ بھی پڑھیں: میٹا چیٹ بوٹ سے ملنے کی کوشش میں امریکی شہری کی ہلاکت
رپورٹس کے مطابق جیسیکا فوسٹر نامی سوشل میڈیا شخصیت بظاہر ایک امریکی فوجی اور سرگرم سیاسی حامی کے طور پر سامنے آئی، تاہم تحقیقات سے معلوم ہوا کہ وہ کوئی حقیقی انسان نہیں بلکہ اے آئی ٹیکنالوجی کے ذریعے تیار کیا گیا ڈیجیٹل ماڈل ہے، جس کا وجود صرف آن لائن دنیا تک محدود ہے۔
انسٹاگرام پر مختصر عرصے میں غیر معمولی مقبولیت حاصل کرنے والی اس شخصیت کی تصاویر، پیغامات اور آن لائن شناخت مکمل طور پر مصنوعی انداز میں تیار کی گئی تھیں۔ اس کے مواد میں اکثر اسے ڈونلڈ ٹرمپ کی حمایت کرتے یا ان سے وابستگی ظاہر کرتے دکھایا جاتا تھا، جس کے باعث اس کے مداحوں کی تعداد تیزی سے بڑھتی گئی۔
یہ بھی پڑھیں: کیا یہ واقعی خاتون ہیں؟ ووگ میں اے آئی ماڈل کی موجودگی نے معیار حسن پر سوالات اٹھا دیے
ماہرین کے مطابق ایسے اے آئی کردار مخصوص نظریات یا حلقوں کو متاثر کرنے کے لیے تخلیق کیے جاتے ہیں۔ ان کا مقصد صارفین کی توجہ حاصل کرنا، انہیں دیگر پلیٹ فارمز کی طرف منتقل کرنا یا مختلف ذرائع سے مالی فائدہ حاصل کرنا بھی ہو سکتا ہے۔
رپورٹس میں بتایا گیا ہے کہ مذکورہ اکاؤنٹ نے گزشتہ سال دسمبر میں انسٹاگرام جوائن کیا تھا اور چند ہی ماہ میں اس کے فالوورز کی تعداد 10 لاکھ سے تجاوز کر گئی، جس کے بعد اس کی حقیقت سامنے آنے پر سوشل میڈیا صارفین میں حیرت کی لہر دوڑ گئی۔
