نائب وزیراعظم اور وزیر خارجہ اسحاق ڈار نے اعلان کیا ہے کہ وزارت خارجہ نے عوام کی سہولت کے لیے قونصلر خدمات کی فراہمی کے اوقات کار میں توسیع کرتے ہوئے شام کی شفٹ کا آغاز کر دیا ہے۔
یہ بھی پڑھیں: بھارت کا بیان بے بنیاد، اشتعال انگیز اور حقائق کے منافی ہے، دفتر خارجہ
اسحاق ڈار نے سماجی رابطے کی ویب سائٹ ایکس پر جاری بیان میں کہا کہ اب قونصلر خدمات پیر سے جمعہ تک صبح 8 بجے سے رات 8 بجے تک دستیاب ہوں گی، جس سے شہریوں کو زیادہ سہولت اور آسان رسائی حاصل ہوگی۔
وزارت خارجہ کے مطابق یہ اقدام قونصلر خدمات کو مزید مؤثر، تیز رفتار اور عوام دوست بنانے کی وسیع حکمت عملی کا حصہ ہے۔ نئے اوقات کار سے متعلق تفصیلات وزارت کی جانب سے جاری عوامی نوٹس میں بھی فراہم کردی گئی ہیں۔
یہ بھی پڑھیں: صومالیہ میں پاکستانی یرغمالیوں کی رہائی کے لیے کوششیں جاری، معاملہ انتہائی پیچیدہ مگر حکومت متحرک ہے، ترجمان دفتر خارجہ
اس سے قبل وزارت خارجہ میں قونصلر خدمات صرف سرکاری دفتری اوقات کے دوران فراہم کی جاتی تھیں، جس کے باعث ملازمت پیشہ افراد اور بیرون ملک مقیم پاکستانیوں سمیت متعدد شہریوں کو مقررہ وقت میں خدمات حاصل کرنے میں مشکلات کا سامنا کرنا پڑتا تھا۔
حکام کا کہنا ہے کہ شام کی شفٹ کے آغاز سے درخواست گزاروں کو زیادہ لچکدار اوقات میں قونصلر خدمات میسر آئیں گی، جس سے عوام کو بہتر سہولت فراہم کرنے میں مدد ملے گی۔
