پاکستان کی وزارت اطلاعات و نشریات نے طالبان رجیم کے مبینہ ترجمان کی جانب سے عیدالفطر کے موقع پر پاکستان کی طرف سے جنگ بندی کی خلاف ورزی کے دعوے کو بے بنیاد اور گمراہ کن قرار دیتے ہوئے سختی سے مسترد کر دیا ہے۔
یہ بھی پڑھیے عیدالفطر کا احترام: حکومت پاکستان کا افغانستان میں دہشتگردوں کیخلاف آپریشن عارضی طور پر روکنے کا اعلان
وزارت کی جانب سے جاری کردہ فیکٹ چیک بیان میں کہا گیا ہے کہ پاکستان نے عیدالفطر کے پیش نظر خود عارضی جنگ بندی کا آغاز کیا تھا اور مغربی سرحد پر اس کی کسی قسم کی خلاف ورزی نہیں کی گئی۔ بیان کے مطابق اس حوالے سے کیے جانے والے تمام دعوے مکمل طور پر جھوٹے ہیں۔
مزید کہا گیا ہے کہ یہ پروپیگنڈا ممکنہ طور پر طالبان حکومت کے اندر موجود بعض عناصر کی جانب سے پھیلایا جا رہا ہے، جس کا مقصد کسی ممکنہ دہشتگرد کارروائی یا دیگر اقدامات کے لیے جھوٹا جواز پیدا کرنا ہو سکتا ہے۔
یہ بھی پڑھیے اقوام متحدہ کا پاک فوج کی فتنہ الخوارج اور طالبان رجیم کے خلاف کارروائیوں میں عارضی وقفے کا خیرمقدم
وزارت اطلاعات نے واضح کیا ہے کہ اگر افغان طالبان حکومت یا اس کے حمایت یافتہ عناصر کی جانب سے کسی بھی قسم کی دہشتگردی، سرحد پار حملہ یا ڈرون کارروائی کی گئی تو عارضی جنگ بندی فوراً ختم کر دی جائے گی اور آپریشن ’غضب للحق‘ دوبارہ پوری شدت کے ساتھ شروع کیا جائے گا۔
