ٹیکنالوجی کمپنی میٹا نے اپنے اسمارٹ گلاسز کی یورپی لانچ مؤخر کر دی ہے، جس کی وجہ یورپی یونین کے بیٹری قوانین، مصنوعی ذہانت سے چلنے والے آلات اور سپلائی کے مسائل ہیں۔
میٹا کا یہ پروڈکٹ ایسسلور لُکسوٹیکا کے ساتھ تیار کیا گیا ہے اور اس وقت صرف امریکا میں دستیاب ہے۔ کمپنی یورپی مارکیٹ کے لیے کافی سپلائی حاصل کرنے میں مشکلات کا سامنا کررہی ہے کیونکہ یورپی قوانین 2027 تک تمام ڈیوائسز میں الگ ہونے والی بیٹری لازمی قرار دیتے ہیں، جو کمپیکٹ اسمارٹ گلاسز کے ڈیزائن میں پیچیدگیاں پیدا کرتا ہے۔
یہ بھی پڑھیں: مستقبل میں اسمارٹ گلاسز کے بغیر زندگی کا تصور مشکل ہوگا،مارک زکربرگ
نئے قوانین کی وجہ سے بیٹری کی مدت کم ہوسکتی ہے یا اضافی فیچرز کے لیے جگہ محدود ہوجائے گی۔ چونکہ یہ اسمارٹ گلاسز مصنوعی ذہانت پر کام کرتے ہیں، یورپی ضوابط ان کی دستیاب خصوصیات کو محدود کر دیں گے۔
میٹا کا کہنا ہے کہ وہ اس وقت تک پروڈکٹ ریلیز نہیں کرنا چاہتی جب تک تمام فیچرز مکمل طور پر فعال نہ ہوں۔ کمپنی یورپی حکام سے اے آئی سے چلنے والے پہننے کے آلات کے لیے استثنا حاصل کرنے کی بات چیت کررہی ہے۔
یہ مسئلہ صرف میٹا تک محدود نہیں؛ ایپل نے بھی یورپ میں کئی سافٹ ویئر اپ ڈیٹس کو قوانین کی وجہ سے مؤخر کیا ہے۔ میٹا اپنے اسمارٹ گلاسز کی ترقی کے عزم پر قائم ہے جو اس کے مجموعی اے آئی منصوبے کا بنیادی حصہ ہیں۔
یہ بھی پڑھیں: اسمارٹ گلاسز کا خطرناک استعمال، خواتین سوشل میڈیا پر ہراسانی کا شکار
کمپنی نے رے بین اور اوکلی کے ساتھ تعاون کے معاہدے کیے ہیں اور پرادا کے ساتھ لگژری شراکت داری پر بھی پیشرفت کا امکان ہے۔ 2026 میں میٹا اور ایسسلور لُکسوٹیکا پیداوار کو بڑھانے کے منصوبے شروع کریں گے تاکہ مارکیٹ کی بڑھتی ہوئی ضروریات کو پورا کیا جاسکے۔
