وفاقی وزیر پٹرولیم علی پرویز ملک نے کہا ہے کہ حکومت آئندہ دنوں میں پیٹرول کی قیمتوں میں کوئی بڑی تبدیلی کرنے کا ارادہ نہیں رکھتی۔
نجی ٹی وی سے گفتگو کرتے ہوئے علی پرویز ملک نے عوام کو یقین دلایا کہ ملک میں پیٹرول کی سپلائی اور دستیابی میں کسی قسم کی کمی نہیں ہے اور صورتحال مکمل طور پر معمول کے مطابق ہے۔
BREAKING 🚨🚨🚨🚨
علی پرویز ملک: وفاقی وزیر پٹرولیمحکومت پٹرول کی قیمتوں میں آنے والے دنوں میں کوئی بڑی تبدیلی کرنے نہیں جا رہی۔۔۔عوام کو تسلی دوں کہ نا پٹرول کی سپلائی میں کوئی فرق آ رہا ہے نا دستیابی میں۔۔ اس وقت پاکستان میں جو پٹرول کی قیمتیں ہیں اس سے بین الاقوامی قیمتیں… pic.twitter.com/cXsLL6JkBa
— Asma Shirazi (@asmashirazi) March 25, 2026
انہوں نے کہاکہ اس وقت پاکستان میں پیٹرول کی قیمتیں عالمی مارکیٹ کے مقابلے میں کم ہیں۔ ان کے مطابق قیمتوں میں اضافے کا ابتدائی اثر پہلے ہفتے میں عوام نے برداشت کیا، جبکہ گزشتہ 2 ہفتوں کے دوران حکومت نے یہ بوجھ اپنے اوپر لیا۔
وفاقی وزیر نے بتایا کہ قیمتوں کے بوجھ کو بانٹنے کے لیے صوبوں کے ساتھ مشاورت جاری ہے تاکہ عوام پر کم سے کم اثر پڑے۔
علی پرویز ملک نے خبردار کیاکہ ذخیرہ اندوزی میں ملوث عناصر کو کامیاب نہیں ہونے دیا جائے گا، کیونکہ حکومت کے پاس پٹرول کے وافر ذخائر موجود ہیں۔
واضح رہے کہ اس سے قبل یہ خبریں سامنے آئی تھیں کہ حکومت پیٹرول اور ڈیزل کی قیمت میں بڑا اضافے کرنے جا رہی ہے۔
دوسری جانب وفاقی حکومت نے پیٹرولیم مصنوعات کی قیمتیں بڑھانے سے گریز کرنے کے لیے ترقیاتی بجٹ میں 100 ارب روپے کی کٹوتی کردی ہے۔
وزیر منصوبہ بندی احسن اقبال نے نجی ٹی وی سے گفتگو کرتے ہوئے تصدیق کی کہ پی ایس ڈی پی میں 10 فیصد کٹوتی کی گئی ہے اور تمام ترقیاتی منصوبوں پر یکساں طور پر یہ کمی لاگو کی گئی ہے۔
مزید پڑھیں: پیٹرولیم مصنوعات کی قیمتوں میں اضافہ روکنے کے لیے ترقیاتی بجٹ پر کٹ لگا دیا گیا
رواں مالی سال کے لیے پی ایس ڈی پی کی مد میں ترقیاتی بجٹ شروع میں ایک ہزار ارب روپے رکھا گیا تھا، جو کٹوتی کے بعد 900 ارب روپے رہ گیا ہے۔
حکام کا کہنا ہے کہ اس اقدام کا مقصد پیٹرولیم مصنوعات کی قیمتوں میں اضافے کو مؤثر طریقے سے روکا جانا ہے۔
