پاکستان میں تعینات سعودی سفیر نواف بن سعید احمد المالکی نے مشرقِ وسطیٰ میں حالیہ کشیدگی کے دوران پاکستان کے ذمہ دارانہ سفارتی کردار کو سراہتے ہوئے کہا ہے کہ اسلامی جمہوریہ پاکستان نے امن کے فروغ اور بحران کے پرامن حل کے لیے دانشمندانہ اقدامات کیے ہیں، جو علاقائی استحکام کے لیے انتہائی اہم ہیں۔
یہ بھی پڑھیں:ایرانی حملوں پر خطے میں تشویش، پاکستان کی سفارتی کاوشوں پر سعودی عرب کی تعریف
سعودی سفیر نے اپنے ویڈیو پیغام میں کہا کہ خطے میں حالیہ ایرانی حملے، جو مملکت سعودی عرب اور دیگر خلیجی برادر ممالک کو نشانہ بنا رہے ہیں، نہایت تشویشناک ہیں اور یہ خودمختار ریاستوں کے خلاف بلاجواز جارحیت کے مترادف ہیں۔ انہوں نے کہا کہ یہ اقدامات بین الاقوامی قانون اور اقوام متحدہ کے منشور کی کھلی خلاف ورزی ہیں، جن کے نتیجے میں قیمتی انسانی جانیں ضائع ہوئیں اور رہائشی علاقوں، ہوائی اڈوں اور شہری انفراسٹرکچر کو بھی نشانہ بنایا گیا۔
چیئرمین پاکستان علما کونسل طاہر اشرفی نے وی نیوز کے ساتھ خصوصی گفتگو کرتے ہوئے کہا ہم سمجھتے ہیں کہ عرب ممالک ہمارے کہنے پر صبر کر رہے ہیں اور اُن کے صبر کی تحسین ہونی چاہیے۔ ایران پر حملے سعودی عرب کی جانب سے نہیں ہو رہے اور سعودی عرب جہاں تمام مسلمانوں کی عقیدت کا مرکز ہے اور تمام مسلمانوں کے لیے مقدس مقام ہے۔ اُس کی سالمیت اگر خطرے میں پڑتی ہے تو اِس پر تمام مسلمان متفکر ہو جائیں گے۔ اُنہوں نے کہا کہ ایرانی قیادت کو مل کر مسلم قیادت سے بیٹھ کر مسئلے کا حل نکالنا چاہیے۔
ممتاز عالمِ دین اور مذہبی اسکالر علامہ ابتسام الٰہی ظہیر نے کہا ہے کہ مشرقِ وسطیٰ میں جاری کشیدگی کے تناظر میں ہر قسم کے حملوں کی یکساں مذمت ہونی چاہیے، خواہ وہ ایران پر ہوں یا دیگر مسلم ممالک کو نشانہ بنایا جائے، اسرائیل اور امریکا کی جانب سے ایران پر ہونے والے حملے قابلِ مذمت ہیں، تاہم اس کے ساتھ ساتھ ایران کی طرف سے دیگر مسلم ممالک، بالخصوص سعودی عرب، بحرین، قطر، کویت اور متحدہ عرب امارات پر حملوں کو بھی نظر انداز نہیں کیا جا سکتا۔
انہوں نے کہا کہ اگر کسی ملک کا ہدف اسرائیل ہو تو مسلم دنیا کے عوام اور حکمران اس کے ساتھ کھڑے ہوں گے، تاہم مسلم ممالک کے اندرونی انفراسٹرکچر، جیسے آئل ریفائنریز پر حملے امت کے اتحاد کو نقصان پہنچاتے ہیں اور ان کی بھی بھرپور مذمت ہونی چاہیے۔
علامہ ابتسام نے بین الاقوامی قوانین کا حوالہ دیتے ہوئے کہا کہ کسی بھی ملک کے سفارت خانے پر حملہ عالمی قوانین کی سنگین خلاف ورزی ہے۔ انہوں نے مثال دیتے ہوئے کہا کہ اگر پاکستان میں موجود امریکی سفارت خانے کو نشانہ بنایا جائے تو یہ ایک بڑا عالمی تنازع بن سکتا ہے اور اس کا مقدمہ عالمی سطح پر اٹھایا جا سکتا ہے۔
انہوں نے مزید کہا کہ پاکستان اور سعودی عرب نے حالیہ صورتحال میں صبر و تحمل کا مظاہرہ کیا ہے، جو قابلِ تحسین ہے۔ ان کا کہنا تھا کہ سعودی عرب کو کمزور سمجھنا غلطی ہوگی، کیونکہ وہ متعدد حملوں کے باوجود امتِ مسلمہ کے امن اور استحکام کے لیے تحمل کا مظاہرہ کر رہا ہے۔
