خیبرپختونخوا ڈیزاسٹر مینجمنٹ اتھارٹی (پی ڈی ایم اے) نے 25 مارچ سے جاری بارشوں کے باعث صوبے کے مختلف اضلاع میں ہونے والے جانی و مالی نقصان کی ابتدائی رپورٹ جاری کی ہے۔
رپورٹ کے مطابق بارشوں کے نتیجے میں اب تک گھروں کی چھتیں اور دیواریں گرنے سے 17 افراد جاں بحق اور 56 افراد زخمی ہوئے ہیں۔
مزید پڑھیں: اسلام آباد کے مختلف علاقوں میں تیز ہواؤں اور گرج چمک کے ساتھ بارش
جاں بحق افراد میں 14 بچے، ایک مرد اور 2 خواتین شامل ہیں، جبکہ زخمیوں میں 25 مرد، 5 خواتین اور 26 بچے شامل ہیں۔
پی ڈی ایم اے کی رپورٹ میں بتایا گیا ہے کہ بارشوں کے باعث مجموعی طور پر 11 گھروں کو جزوی نقصان پہنچا، یہ حادثات صوبے کے اضلاع بنوں، ایبٹ آباد، کوہاٹ، دیر اپر، باجوڑ، بٹگرام اور شمالی وزیرستان میں پیش آئے۔
پی ڈی ایم اے، ریسکیو 1122، ضلعی انتظامیہ اور متعلقہ ادارے امدادی سرگرمیوں میں مسلسل رابطے میں ہیں اور متاثرین کی فوری مدد جاری ہے۔
پی ڈی ایم اے نے متاثرہ اضلاع کی انتظامیہ کو ہدایت کی ہے کہ متاثرہ افراد کو جلد از جلد امدادی سامان فراہم کیا جائے، خاص طور پر سب سے زیادہ متاثرہ ضلع بنوں میں جاں بحق افراد کے لواحقین کو فوری امداد پہنچائی جائے۔
ضلعی انتظامیہ کو امدادی کارروائیاں تیز کرنے اور متاثرین کو فوری معاونت فراہم کرنے کی ہدایت کی گئی ہے۔
صوبے کے مختلف اضلاع میں بارشوں کا سلسلہ وقفے وقفے سے جاری ہے اور یہ منگل تک جاری رہنے کا امکان ہے۔
مزید پڑھیں: جڑواں شہروں میں بارش، واسا ہائی الرٹ، نکاسیٔ آب کے اقدامات جاری
پی ڈی ایم اے کی جانب سے عوام سے اپیل کی گئی ہے کہ بلا ضرورت سفر سے گریز کریں، حساس سیاحتی مقامات کا رخ نہ کریں اور حکومتی اداروں کی جانب سے جاری الرٹس اور ہدایات پر عمل کریں۔
پی ڈی ایم اے کے مطابق ایمرجنسی آپریشن سینٹر مکمل طور پر فعال ہے اور کسی بھی ناخوشگوار واقعے یا موسمی صورتحال سے متعلق معلومات کے لیے فری ہیلپ لائن 1700 پر رابطہ کیا جا سکتا ہے۔
