اسلام آباد میں شدید بارش کے باعث پشاور سے اسلام آباد موٹروے پر مسافر بردار گاڑیوں کی آمد و رفت عارضی طور پر معطل کر دی گئی ہے، جبکہ حکام نے شہریوں کو احتیاط برتنے کی ہدایت کی ہے۔
ترجمان موٹروے پولیس کے مطابق یہ اقدام مسافروں کے تحفظ کو یقینی بنانے کے لیے اٹھایا گیا ہے۔
یہ بھی پڑھیں: اسلام آباد کے مختلف علاقوں میں تیز ہواؤں اور گرج چمک کے ساتھ بارش
’۔۔۔ کیونکہ مسلسل بارش کے نتیجے میں سڑک پر پھسلن بڑھ گئی ہے اور حدِ نگاہ بھی متاثر ہو رہی ہے، جس سے حادثات کا خطرہ بڑھ سکتا ہے۔‘
موٹروے پولیس کی جانب سے سوشل میڈیا پلیٹ فارم پر بتایا گیا ہے کہ لاہور میں ایم-2 کو بھی ٹھوکر نیاز بیگ سے کوٹ مومن تک شدید بارش کے باعث بند کردیا گیا ہے۔
اطلاع: مسافر بردار گاڑیوں کا داخلہ بند ہے۔
مقام: ایم-1، مین ٹول پلازہ اسلام آباد تا مین ٹول پلازہ پشاور۔
وجہ: شدید بارش۔— National Highways & Motorway Police (NHMP) (@NHMPofficial) March 30, 2026
حکام نے شہریوں کو غیر ضروری سفر سے گریز کرنے اور موسمی حالات بہتر ہونے تک انتظار کرنے کا مشورہ دیا ہے۔
موٹروے پولیس کا کہنا ہے کہ صورتحال معمول پر آتے ہی ٹریفک بحال کر دی جائے گی، جبکہ متعلقہ عملہ مسلسل حالات کی نگرانی کر رہا ہے۔
مزید پڑھیں: خیبرپختونخوا میں بارشوں کے دوران مختلف حادثات، 17 افراد جاں بحق
دریں اثنا، نیشنل ڈیزاسٹر مینجمنٹ اتھارٹی نے ملک کے مختلف علاقوں میں بارش، برفباری اور ممکنہ سیلاب کے خدشے کے پیش نظر الرٹ جاری کر دیا ہے۔
دوسری جانب ترجمان اسلام آباد پولیس کے مطابق وفاقی دارالحکومت میں وقفے وقفے سے بارش کا سلسلہ جاری ہے، جس کے باعث کئی شاہراہوں پر پانی جمع ہو گیا ہے اور ٹریفک کی روانی متاثر ہو رہی ہے۔
ٹریفک پولیس کے افسران سڑکوں پر موجود رہتے ہوئے ٹریفک کی روانی برقرار رکھنے کے لیے اقدامات کر رہے ہیں۔
