شہرِ قائد کے مختلف علاقوں میں رات گئے موسلا دھار بارش اور ژالہ باری کا سلسلہ جاری رہا، جس کے باعث جہاں موسم خوشگوار ہوا وہیں حادثات میں ایک اور ہلاکت بھی رپورٹ ہوئی ہے۔
یہ بھی پڑھیں:کراچی میں موسلا دھار بارش: بچی سمیت 6 افراد جاں بحق، سیلابی صورتحال
گلستانِ جوہر میں کرنٹ لگنے سے ایک شخص کی جان چلی گئی، جس کے بعد گزشتہ دو روز کے دوران بارش سے متعلقہ واقعات میں جاں بحق ہونے والوں کی مجموعی تعداد 7 تک پہنچ گئی ہے۔ بارش کے ساتھ ہی کئی علاقوں میں بجلی کی فراہمی بھی معطل ہو گئی۔
رات بھر جاری رہنے والی اس بارش نے ایئرپورٹ، شاہ فیصل، ملیر، گلستانِ جوہر، لیاقت آباد اور نیو کراچی سمیت شہر کے لگ بھگ تمام حصوں کو اپنی لپیٹ میں لیے رکھا۔ اس کے علاوہ جہانگیر روڈ، گرومندر، یونیورسٹی روڈ، ناردرن بائی پاس، گارڈن، سرجانی اور اورنگی ٹاؤن میں بھی بادل جم کر برسے، جبکہ کچھ مقامات پر ژالہ باری (اولے) بھی دیکھی گئی۔
یہ بھی پڑھیں:کراچی میں بارش کا نیا سلسلہ، مختلف علاقوں میں موسلا دھار بارش، انتظامیہ الرٹ
محکمہ موسمیات کے مطابق مغربی ہواؤں کا یہ طاقتور سلسلہ اب آہستہ آہستہ جنوب مشرق کی جانب بڑھ رہا ہے، تاہم ملک کے دیگر حصوں میں یہ سسٹم 4 اپریل تک اثر انداز رہے گا۔ کراچی کے حوالے سے پیش گوئی کی گئی ہے کہ آج شہر میں تیز بارش کا امکان تو نہیں، لیکن مطلع جزوی طور پر ابر آلود رہے گا اور مختلف علاقوں میں ہلکی بارش یا بوندا باندی ہو سکتی ہے۔
