بلوچستان کے عازمین حج کے لیے حجاز مقدس کا سفر آسان ہو گیا۔ کوئٹہ سے براہ راست پروازوں کا آغاز ہونے کے بعد کوئٹہ انٹرنیشنل ایئر پورٹ نے ایک اور اہم سنگ میل طے کر لیا۔
ترجمان پاکستان سول ایویشن اتھارٹی کے مطابق پی کے 747 نے نئے رن وے پر گزشتہ شب پہلی ’نائٹ لینڈنگ‘ کی، یہی پرواز بعد ازاں 145 عازمین حج کو لے کر براہ راست مدینہ کے لیے روانہ ہو گئی۔ اس سے پہلے پی کے 6133 اور 6137 تین سو عازمین حج کو لے کر مدینہ روانہ ہوئیں تھیں۔
ترجمان کے مطابق جہاز کے پائلٹس نے کہا کہ رات میں کوئٹہ ایئرپورٹ کے نئے کیٹ-ٹو رن وے پر اترنا انتہائی خوشگوار تجربہ تھا۔ اس سے قبل کوئٹہ سے عازمین حج کو پہلے کراچی کا سفر کرنا پڑتا تھا، حال ہی میں اپ گریڈڈ 12,000 فٹ لمبے رن وے کی بدولت براہ راست پروازیں ممکن ہوئیں۔
ترجمان سول ایوی ایشن نے بتایا کہ نئے رن وے پر CAT-II جدید ایئر فیلڈ لائٹنگ سسٹم ہر قسم کے موسمی حالات میں آپریشنز کو یقینی بناتا ہے۔ نئے رن وے کی بدولت وائیڈ باڈی جہاز (بوئنگ 777 اور اس کے مساوی) اب کوئٹہ ایئرپورٹ لینڈ کر سکتے ہیں۔
