ایران اور امریکا کے درمیان کشیدگی کے خاتمے اور جنگ بندی کے اعلان کے بعد گلگت بلتستان میں بھی خوشی کی فضا چھا گئی ہے۔
اسکردو کے شہریوں نے سڑکوں اور مختلف مقامات پر جمع ہو کر خوشی کا اظہار کیا اور ایک دوسرے میں مٹھائیاں تقسیم کیں۔
مقامی افراد کا کہنا ہے کہ وزیراعظم پاکستان شہباز شریف اور آرمی چیف فیلڈ مارشل سید عاصم منیر کی مؤثر سفارتی کوششوں نے عالمی سطح پر امن کے قیام میں اہم کردار ادا کیا ہے، جس پر پوری قوم فخر محسوس کر رہی ہے۔
شہریوں نے پاکستان کی قیادت کو خراج تحسین پیش کرتے ہوئے کہا کہ ملک نے ایک بار پھر دنیا میں امن کے فروغ میں مثبت کردار ادا کیا ہے۔
اسکردو کے مختلف علاقوں میں نوجوانوں اور بزرگوں نے پاکستان کے حق میں نعرے لگائے اور اس کامیابی کو قومی فخر کا لمحہ قرار دیا۔
عوام نے کہاکہ پاکستان ہمیشہ امن کا داعی رہا ہے اور اس بار بھی اس نے اپنی ذمہ داری احسن طریقے سے نبھائی ہے۔
