بورڈ آف انٹرمیڈیٹ اینڈ سیکنڈری ایجوکیشن راولپنڈی نے جمعرات کو اعلان کیا ہے کہ 10 اپریل یعنی جمعہ کو ہونے والے میٹرک کے امتحانات ملتوی کر دیے گئے ہیں۔
امتحانات وفاقی دارالحکومت میں امریکا اور ایران کے مابین مذاکرات کے باعث متوقع غیر معمولی سفارتی سرگرمیوں کے پیش نظر ملتوی کیے گئے ہیں۔
بورڈ کی جانب سے جاری بیان کے مطابق شہر کے 64 امتحانی مراکز میں ہونے والے پرچے ملتوی کیے گئے ہیں۔
یہ بھی پڑھیں: اسلام آباد مذاکرات: امریکی اور ایرانی وفود آج پاکستان پہنچیں گے، سعودی وزیر خارجہ کا عراقچی اور اسحاق ڈار سے رابطہ
تاہم راولپنڈی ڈویژن کے دیگر اضلاع میں امتحانات شیڈول کے مطابق جاری رہیں گے۔
بیان میں کہا گیا ہے کہ ملتوی کیے جانے والے امتحانات میں لازمی اردو اور جغرافیہ کے پرچے شامل ہیں۔
ان پرچوں کی نئی تاریخ کا اعلان بعد میں کیا جائے گا اور امیدواروں کو باقاعدہ طور پر آگاہ کیا جائے گا۔
مزید پڑھیں:جنگ بندی کا فیصلہ پاکستان کی درخواست پر کیا گیا، صدر ٹرمپ
دوسری جانب ضلعی انتظامیہ نے جڑواں شہروں اسلام آباد اور راولپنڈی میں 9 اور 10 اپریل کو مقامی تعطیلات کا اعلان کیا ہے تاکہ متوقع مذاکرات کے دوران سیکیورٹی انتظامات کو یقینی بنایا جا سکے۔
حکام کے مطابق مذاکرات کی حساسیت اور اہمیت کے پیش نظر تمام قانون نافذ کرنے والے اداروں اور سیکیورٹی فورسز کی مدد سے جامع حفاظتی اقدامات کیے گئے ہیں۔
