محکمہ داخلہ بلوچستان نے صوبے بھر میں انٹرمیڈیٹ کے سالانہ امتحانات کو شفاف، محفوظ اور نقل سے پاک بنانے کے لیے امتحانی مراکز کے اطراف دفعہ 144 نافذ کرنے کا اعلان کردیا ہے۔
یہ بھی پڑھیں: بلوچستان میں انٹرمیڈیٹ کے امتحانات 3 ہفتوں کے لیے کیوں ملتوی ہوئے؟
محکمہ داخلہ بلوچستان کے مطابق انٹرمیڈیٹ امتحانات کا باقاعدہ آغاز 14 اپریل 2026 سے ہوگا، جس کے لیے تمام تر تیاریاں مکمل کر لی گئی ہیں، نئی ہدایات کے مطابق امتحانی مراکز کے گرد و نواح میں سیکیورٹی کے انتظامات کو انتہائی سخت کرنے کا فیصلہ کیا گیا ہے۔
محکمہ داخلہ کا کہنا ہے کہ امتحانی مرکز کی حدود سے 100 گز کے دائرے میں غیر متعلقہ افراد کے داخلے پر مکمل پابندی ہوگی، جبکہ اس دوران کسی بھی قسم کے غیر مجاز اجتماعات اور مشکوک سرگرمیوں کی ہرگز اجازت نہیں دی جائے گی۔
یہ بھی پڑھیں: بلوچستان میں یکم اپریل سے تمام تعلیمی ادارے دوبارہ کھولنے کا اعلان
محکمہ داخلہ بلوچستان نے واضح کیا ہے کہ دفعہ 144 کا نفاذ امتحانات کے اختتام تک برقرار رہے گا اور ان احکامات کی خلاف ورزی کرنے والوں کے خلاف سخت قانونی کارروائی عمل میں لائی جائے گی۔
اس سلسلے میں ضلعی انتظامیہ اور پولیس کو خصوصی ہدایات جاری کر دی گئی ہیں کہ وہ امتحانی عمل کو ہر صورت محفوظ اور شفاف بنانے کے لیے تمام ضروری اقدامات کو یقینی بنائیں۔
