وفاقی وزیر منصوبہ بندی احسن اقبال نے کہا ہے کہ اس وقت عالمی برادری کی تمام تر توجہ کا مرکز پاکستان ہے، بھارت کو چاہیے کہ وہ حسد کی آگ میں جلنے کے بجائے پاکستان کا احسان مانے، کیونکہ پاکستان نے بھارت سمیت پوری دنیا کو ایک بڑی تباہی سے محفوظ رکھا ہے۔
اپنے ایک بیان میں وفاقی وزیر نے کہاکہ حالیہ جنگی صورتحال نے عالمی معیشت کو شدید بحران سے دوچار کر دیا تھا، تاہم اللہ تعالیٰ نے پاکستان کو وہ اعزاز بخشا کہ وہ اس جنگ کو ختم کروانے کا ذریعہ بنا۔
ان کا کہنا تھا کہ آج امن کی خاطر امریکی اور ایرانی وفود کا اسلام آباد میں موجود ہونا پاکستان کی سفارتی کامیابی اور عزت کی دلیل ہے۔
احسن اقبال نے کہاکہ ملک کو یہ عالمی وقار وزیراعظم شہباز شریف اور فیلڈ مارشل عاصم منیر کی انتھک کوششوں کی بدولت حاصل ہوا ہے۔
سرحد پار کی صورتحال کا تذکرہ کرتے ہوئے انہوں نے کہاکہ اگر سرحد کے دوسری طرف دیکھا جائے تو وہاں سے اٹھتا ہوا دھواں واضح ہے، اور ہمارے پڑوسی اس کامیابی پر کوئلے کی طرح جل کر راکھ ہو رہے ہیں۔
انہوں نے مزید کہاکہ بھارت کو بغض رکھنے کے بجائے ممنون ہونا چاہیے کہ پاکستان نے خطے کو بڑی بربادی سے بچایا۔ ان کے بقول، پہلے میدانِ جنگ میں حق کا معرکہ اور اب امن کی کوششوں نے عالمی سطح پر پاکستان کا سر فخر سے بلند کر دیا ہے۔
احسن اقبال کا یہ بیان ایسے وقت میں سامنے آیا ہے جب اسلام آباد میں امریکا اور ایران کے درمیان مذاکرات ہو رہے ہیں، اور پاکستان اس میں اہم کردار ادا کررہا ہے۔
