پاکستان کے صف اول کے ڈیجیٹل مائیکروفنانس بینک، موبی لنک بینک نے ایچ بی ایل زرعی سروسز لمیٹڈ کے ساتھ مفاہمتی یادداشت پر دستخط کیے ہیں۔ اس شراکت داری کا مقصد ’زرخیزی آسان ڈیجیٹل زرعی قرضہ اسکیم‘ کے تحت کسانوں کو زرعی قرضوں کی دستیابی اور آسان رسائی کو وسعت دینا ہے۔
یہ بھی پڑھیں: موبی لنک بینک اور سندھ انٹرپرائز ڈویلپمنٹ فنڈ کے درمیان معاہدہ، سندھ میں ایس ایم ایز کو ایک ارب روپے تک فنانسنگ
اس اشتراک کے تحت موبی لنک بینک ملک بھر کے کسانوں کو زرعی اجناس اور سہولیات کی فراہمی کے لیے قرضے فراہم کرے گا۔ ایچ بی ایل زرعی سروسز کے اشتراک سے بینک قرضوں کو ضروری زرعی وسائل اور خدمات سے منسلک کرے گا، تاکہ مالی معاونت کے درست اور پیداواری مقاصد کے لیے استعمال اور کسانوں کی پیداوار میں بہتری کو یقینی بنایا جا سکے۔ اس کے ساتھ ساتھ ڈیجیٹل ذرائع سے فنانسنگ کے عمل کو تیز تر اور آسان بنایا جائے گا، تاکہ ادائیگیوں اور لین دین کا نظام مزید مؤثر ہو سکے۔
دوسری جانب ایچ بی ایل زرعی سروسز ایک مستند زرعی ادارے کی حیثیت سے کسانوں کو معیاری زرعی وسائل، مسلسل رہنمائی، بوقت ضرورت مشینری کے استعمال کی سہولت، اور فصل کی بہتر فروخت کے منظم مواقع فراہم کرے گا۔ یہ مربوط نظام مالی معاونت کو عملی استعمال اور مارکیٹ تک رسائی سے جوڑے گا، جس سے شفافیت بڑھے گی، رکاوٹیں کم ہوں گی اور کسانوں کے مالی استحکام میں اضافہ ہوگا۔
یہ بھی پڑھیں: پاکستان کے ڈیجیٹل بینکاری نظام پر سرمایہ کاروں کا اعتماد مستحکم، 20 ملین ڈالر کی انویسٹمنٹ کا اعلان
اس موقع پر اظہارِ خیال کرتے ہوئے موبی لنک بینک کے صدر و سی ای او، حارث محمود چوہدری نے کہا کہ ’یہ اشتراک زرعی مالی معاونت کو ایک مربوط شکل دے گا، جس سے قرضوں کو زرعی وسائل، زرعی رہنمائی اور منڈی تک رسائی سے جوڑا جاسکے گا۔ اس اشتراک کا مقصد فنانسنگ کے ذریعے کسانوں کو بہتر نتائج کے حصول میں مدد دینا اور پائیدار روزگار کو فروغ دینا ہے۔‘
ایچ بی ایل زرعی سروسز لمیٹڈ کے چیف ایگزیکٹو آفیسر، عامر عزیز نے کہا کہ ’مالی سہولت کو زرعی خدمات کے ساتھ جوڑنے سے کسانوں کی پیداوار میں حقیقی اضافہ، بہتر فصلیں اور منڈی تک رسائی کے بہتر مواقع ممکن ہوں گے۔‘
