گورنمنٹ بوائز ہائی سکول چھب، تحصیل جنڈ ضلع اٹک میں ایک نہایت دل کو چھو لینے والا اور یادگار منظر دیکھنے میں آیا، جہاں 1977 کے سابق طلبہ تقریباً 49 سال بعد ایک بار پھر اپنے پی ٹی ٹیچر عبداللہ صاحب کے ساتھ اسی اسکول گراؤنڈ میں فزیکل ڈرل کرتے نظر آئے۔
یہ وہی میدان تھا، وہی استاد تھے اور وہی یادگار ماحول۔ بس وقت کی رفتار نے ان شاگردوں کو عمر رسیدہ کر دیا تھا مگر ان کے چہروں پر موجود جذبات اور دلوں میں موجود احترام آج بھی ویسا ہی تازہ تھا جیسا نصف صدی قبل تھا۔
وقت ہار گیا،استاد جیت گیا…49 سال بعد شاگردوں کی دوبارہ ڈرل!
گورنمنٹ بوائز ہائی سکول چھب،تحصیل جنڈ ضلع اٹک میں ایک یادگار اور جذباتی مناظر، جہاں پی ٹی ٹیچر عبداللہ صاحب نے 1977 کے اپنے شاگردوں کو 2026 میں ایک بار پھر سکول گراؤنڈ میں فزیکل ڈرل کروائی،وہی میدان،وہی استاد مگر… pic.twitter.com/EwBVUe47ld
— Amjad Aziz Malik (T.I) (@AmjadAzizMalik1) April 15, 2026
جیسے ہی ڈرل کا آغاز ہوا تو ماضی کے دریچے ایک بار پھر کھل گئے۔ ہر حرکت کے ساتھ پرانی یادیں تازہ ہوتی چلی گئیں۔ شرکاء کے مطابق یہ لمحہ ان کی زندگی کا ایک انتہائی جذباتی اور ناقابلِ فراموش تجربہ تھا جس میں یوں محسوس ہوا جیسے وقت چند لمحوں کے لیے واپس پلٹ آیا ہو۔
سوشل میڈیا پر اس منظر کو بے حد پذیرائی حاصل ہوئی۔ صارفین کی جانب سے مختلف تبصروں میں اس یادگار لمحے کو خوب سراہا گیا۔ کسی نے اسے ’وقت کی واپسی‘ قرار دیا تو کسی نے استاد اور شاگرد کے لازوال رشتے کی شاندار مثال کہا۔ متعدد افراد نے اس جذباتی ملاقات کو تعلیم و تربیت کے حقیقی حسن کی عکاسی قرار دیا۔
