ایوان صدر پاکستان کے میڈیا ونگ سے جاری بیان کے مطابق صدر مملکت آصف علی زرداری نے یومِ ارض کے موقع پر اپنے پیغام میں کہا ہے کہ زمین کا عالمی دن ہمیں ماحول کے تحفظ کی مشترکہ ذمہ داری کا احساس دلاتا ہے۔
مزید پڑھیں:عالمی یوم ارض پر گوگل کا خصوصی ڈوڈل جاری
صدر مملکت نے کہا کہ موسمیاتی تبدیلی اور قدرتی آفات اب ایک حقیقت بن چکی ہیں، جبکہ سیلاب، خشک سالی اور شدید موسمی حالات عوام کی زندگیوں کو متاثر کر رہے ہیں۔ انہوں نے پائیدار ترقی اور ماحولیاتی تحفظ کو اپنے وژن کا حصہ قرار دیتے ہوئے کہا کہ شجرکاری مہمات سرسبز پاکستان کے عزم کی عکاس ہیں۔
انہوں نے زور دیا کہ موسمیاتی تبدیلی سے نمٹنے کے لیے پالیسیوں کو مزید مضبوط بنانا ہوگا اور جنگلات کے تحفظ کے ساتھ ساتھ پانی کے ذخائر کی حفاظت بھی ناگزیر ہے۔ صدر زرداری نے قابلِ تجدید توانائی کے فروغ کو وقت کی اہم ضرورت قرار دیا۔
اپنے پیغام میں انہوں نے کہا کہ ہر شہری، برادری اور ادارے کو ماحول کے تحفظ میں اپنا کردار ادا کرنا چاہیے، جبکہ زیادہ درخت لگانا اور پلاسٹک کے استعمال میں کمی ضروری ہے۔ انہوں نے نوجوان نسل کو ماحولیاتی تحفظ کی اہمیت سے آگاہ کرنے پر بھی زور دیا۔
مزید پڑھیں: خدا کرے میری ارض پاک پر اترے ۔۔۔۔
صدر مملکت نے کہا کہ صاف اور سرسبز پاکستان آئندہ نسلوں کے لیے ہماری ذمہ داری ہے اور فطرت کے ساتھ ہم آہنگ ترقی ہی روشن مستقبل کی ضمانت ہے۔ انہوں نے اس عزم کا اظہار کیا کہ متحد ہو کر ایک مضبوط، خوشحال اور خوبصورت پاکستان بنایا جا سکتا ہے۔
