امریکی وزیر دفاع پیٹ ہیگستھ نے ایران کو خبردار کرتے ہوئے کہا ہے کہ وہ ایٹمی ہتھیار حاصل نہیں کر سکتا لہٰذا اس کے لیے بہتر یہی ہے کہ وہ امریکا کے ساتھ ایک ’اچھی ڈیل‘ کر لے۔
یہ بھی پڑھیں: ایران امریکا مذاکرات: پاکستان کی انتھک کوششیں پھر رنگ لے آئیں، ایرانی وزیر خارجہ کی آج اسلام آباد آمد متوقع
پیٹ ہیگستھ نے کہا کہ ایران کے پاس اب بھی ایک اچھا موقع ہے کہ وہ مذاکرات کی میز پر دانشمندانہ فیصلہ کرلے۔
ان کا کہنا تھا کہ ایران کے خلاف جاری کشیدگی کو 55 دن ہو چکے ہیں اور صورتحال بدستور نازک ہے۔
پیٹ ہیگستھ نے مزید کہا کہ آبنائے ہرمز پر امریکا کا کنٹرول برقرار ہے اور جب تک ضرورت پڑی اس اہم گزرگاہ کی ناکہ بندی جاری رکھی جائے گی۔
مزید پڑھیے: علاقائی و عالمی صورتحال: اسحاق ڈار کی دفترِ خارجہ حکام کو متحرک سفارت کاری کی ہدایت
دوسری جانب سفارتی محاذ پر اہم پیشرفت سامنے آئی ہے۔ حکومتی ذرائع کے مطابق پاکستان کی خاموش سفارتکاری کے نتیجے میں ایران اور امریکا کے درمیان تعطل کا شکار مذاکرات ایک بار پھر بحال ہوتے دکھائی دے رہے ہیں۔
حکومتی ذرائع کا کہنا ہے کہ ایران کے وزیر خارجہ کی آج رات اسلام آباد آمد متوقع ہے۔ دوسری جانب پاکستان کے کچھ نجی ٹی وی چینلز نے یہ دعویٰ کیا ہے کہ امریکی وفد بھی پاکستان روانہ ہورہا ہے۔
مزید پڑھیں: امن مذاکرات: ایران کے جواب نہ دینے پر جے ڈی وینس کا دورہ پاکستان مؤخر ہوا، امریکی میڈیا
اس پیشرفت کے بعد ایران اور امریکا کے درمیان مذاکرات میں بریک تھرو کی امیدیں ایک بار پھر روشن ہو گئی ہیں۔
